10 mart 2011 16:30
“Hər bir oyuna final matçı kimi baxırıq”
“Qarabağ”ın yayda sıralarına qatdığı Ansi Aqolli qısa zamanda hər kəsin rəğbətini qazana bildi. Azerisport.az xəbər verir ki, 28 yaşlı sol cinah müdafiəçisi sabitliyi və peşəkarlığı ilə diqqəti cəlb edir.
Albaniya millisinin də şərəfini qoruyan Aqolli Premyer Liqanın “altılıq” mərhələsinin ilk, bütövlükdə isə 23-cü turunun “İnter”lə görüşü və final mərhələsi haqqında fikirlərini bölüşüb: “İnter”ə qarşı hazırlıqlar normal gedir. İlk oyun olduğuna görə tərəflər istər-istəməz bir qədər həyəcanlı olacaq. Amma biz oyuna 3 xal üçün çıxacağıq. Ümumiyyətlə, bütün oyunlarda 3 xal üçün mübarizə aparırıq. Cari birincilikdə ilk dəfə “İnter”ə məğlub olmuşuq. Rəqibin bəlli bir oyun sistemi var. Kubokda oynamalarının onlara əlavə bir yorğunluq gətirdiyinə inanmıram. Biz bu haqda heç düşünmürük də. Biz istədiyimiz kimi oynadıqdan sonra rəqibin kimliyinin fərqi yoxdu. Qışdan sonra komandamızın heyəti yetərincə genişlənib. Bunun bizə final mərhələsində faydalı olacağını düşünürəm. Bilirik ki, bu məqamda hər bir xal çox qiymətlidi. Ona görə də hər bir oyuna final matçı kimi baxırıq. “Altılıq”dakı digər komandaların da iddialı olması mübarizəni maraqlı edəcək. Amma qeyd etdiyim kimi, biz istədiyimiz kimi oynadıqdan sonra rəqib bizim üçün maraqlı olmur. İnanıram ki, çempionatın sonunda azarkeşlərimizi sevindirəcək nəticə əldə edə biləcəyik”.
