10 mart 2011 16:45
Millimiz nəhayət ki, qələbə qazandı (YENİLƏNİB)
Türkiyənin İzmir şəhərində təşkil olunmuş beynəlxalq turnirin qrup mərhələsi çərçivəsində 17 yaşadək futbolçulardan ibarət Azərbaycan yığması bu gün son oyununu keçirib. Azerisport.az xəbər verir ki, komandamız Türkiyəni təmsil edən Avropa region yığması ilə qarşılaşıb.
Gərgin və maraqlı mübarizəyə səhnə olan görüşdə hesabda hər dəfə önə keçməsinə baxmayaraq, cavab qoluna mane ola bilməyən komandamız yalnız son dəqiqələrdə qələbə topuna imza ata bilib. Yığmamızın heyətində David Qarayev, Ruslan Abdullayev və Ruslan Nəsirli fərqlənib.
Xatırladaq ki, yığmamız turnirdə keçirdiyi ilk iki oyunu eyni hesabla başa vurmuşdu. Həm İrlandiya, həm də Türkiyənin Qərb region yığması ilə qarşılaşmalar 1:1 hesabı ilə yekunlaşmışdı.
Beynəlxalq turnir
10 mart
Azərbaycan - Türkiyənin Avropa region yığması - 3:2 (0:0)
Bu oyunda komandamız meydana aşağıdakı start heyətlə çıxıb: Əyyub Əliyev, Elvin Camalov, Sadiq Quliyev, Adil Nağıyev, Nurlan Şiriyev, Kamran Abdullazadə, Rüstəm Əsgərov, Ruslan Abdullayev, Orxan Əliyev, Qurbanəli Əliyev, Ruslan Nəsirli.
