11 mart 2011 13:21
Qarabağ: İnter üzərində 10-cu, ardıcıl 8-ci qələbə üçün
Sabah Azərbaycan Premyer Liqasının final mərhələsinin ilk turu start götürəcək. Azerisport.az xəbər verir ki, “Qarabağ” “İnter”in qonağı olacaq.
“Şəfa” stadionunda baş tutacaq görüş tərəflərin sayca 30-cu görüşü olacaq. Geridə qalan 29 görüşün 26-sı çempionat, 3-ü isə kubok çərçivəsində baş tutub.
Arxada qalan 26 oyunda “Qarabağ”ın minimal üstünlüyü var. Dekabrın 4-də Rauf Əliyevin vurduğu qolla gələn qələbə sayca 9-cu olub. 8 dəfə isə “bankirlər” 3 xalı bayram edib. Top fərqində də ağdamlılar rəqibi üstələyir. “Qarabağ” 25 qolun qarşılığında qapısında 18 top görüb.
Qeyd edək ki, bu komandalar arasında cari mövsümkü ilk oyun sentyabrın 11-də baş tutub. Bakılılardan Aleksandr Çertoqanovun vurduğu qol cari mövsüm ağdamlıların ilk məğlubiyyətini rəsmiləşdirib. Dekabrın 4-də Suraxanı qəsəbə stadionunda baş tutan cavab oyununda da Ağdam klubunun intiqamı eyni olub.
Bu qələbə eyni zamanda “Qarabağ”ın qələbə seriyasının əsasını qoyub. Son 3 ayda baş tutan 7 görüşün hamısında qələbə qazanan Qurban Qurbanovun komandası yenidən “Şəfa” stadionunda “İnter”lə qarşılaşacaq.
