11 mart 2011 13:36
Elnur Allahverdiyev: Biz heç nəyi unutmamışıq
“Xəzər Lənkəran”ın və milli komandamızın müdafiəçisi Elnur Allahverdiyev azerisport.az saytına müsahibə verib.
- Final mərhələsinin ilk turunda AZAL ilə qarşılaşacaqsız. Bu oyundan nə gözləyirsiz?
- Hesab edirəm ki, XL bu matçın favoritidi. Lakin arxayınlaşmaq olmaz. Çünki AZAL kifayət qədər ciddi komandadı. Çox çətin olacaq, amma biz “Şəfa”da xal itirmək istəmirik. Komandamızın məqsədi “qızıl dubl” etməkdi. Buna görə də, AZAL-la oyunda bizi ancaq qələbə qane edir. Lənkərandakı son oyunumuzda onlar heç də pis təsir bağışlamadılar. Ancaq bu dəfə biz bütün oyunboyu üstünlüyü əlimizdə saxlamaq istəyirik.
- Düşünmürsüz ki, rəqib heç-heçəyə də oynaya bilər?
- Bu, onların işidi. Biz öz 3 xalımızı heç kimə hədiyyə etməyə hazırlaşmırıq. Buna görə də qalan bütün oyunlarımızda qələbə qazanmaq istəyirik. Bakıya da qələbə dalınca gəlmişik. Əminəm ki, bu istəyimizə nail olacağıq. “Neftçi” ilə oyuna kimi xal itirmək olmaz. Liderliyi isə növbəti “Böyük oyun”da qaytarmağı düşünürük.
- Sizə elə gəlmir ki, “Xəzər Lənkəran” “Neftçi” ilə cavab matçında bir qədər arxayın görünürdü?
- Biz evdə də qələbə qazanmaq istəyirdik. Cavab görüşünə çox ciddi hazırlaşmışdıq. Təəssüf ki, erkən qol buraxdıq. Ancaq biz buna dərhal cavab verə bildik. Heç-heçəyə rəğmən, məncə biz öz gücümüzü hər kəsə göstərə bildik. XL yarımfinala yüksəlməyə layiq idi.
- İndi “Neftçi” çempionatda qalan 2 oyunda sizdən revanş almağa çalışacaq...
- “Altılıq”dakı bütün oyunlar çətin olacaq. Əlbəttə, “Neftçi” ilə oyunlar xüsusidi. Biz çempinatı qalib kimi bitirmək istəyirik. Bunun üçün də qalan 10 turun hamısında qələbə qazanmağımız vacibdi. “Neftçi” bizim üçün xüsusi rəqibdi, amma şəxsən mənim üçün “Qarabağ” onlardan güclüdü.
- Yarımfinalda sizi “Bakı” ilə oyun gözləyir...
- Bu komanda bizə tanışdı. Ötən mövsüm onlar bizi həm çempionatın son turunda, həm də ölkə kubokunda məğlub etmişdi. Nəticədə birdən-birə iki tituldan olmuşduq.
- Ancaq siz həmin vaxt XL-da deyildiz. Eləcə də komandanızın indiki oyunçularının əksəri...
- Düzdü, amma biz indi hamılıqla revanş götürmək istəyirik. Bu oyun “Neftçi” ilə duellərdən heç də az maraq doğurmayacaq. Hər iki komanda üçün çox vacib qarşılaşma olacaq. Biz heç nəyi unutmamışıq.
- “Bakı”da hansı futbolçuların oyununu qeyd edərdiz?
- “Bakı”da güclü fubolçular oynayır. Vaqiv Cavadov, Cəmşid Məhərrəmov kimi. Ancaq onların legionerləri şəxsən mənim xoşuma gəlmir. Hesab etmirəm ki, onlar bizim futbolçulardan güclüdülər.
