“Azərbaycan yığması əlverişli imkanları qola çevirə bilmədi”

İzmir şəhərində təşkil olunmuş beynəlxalq turnirdə Türkiyəni təmsil edən Şərq region yığması ilə 17 yaşadək futbolçulardan ibarət Azərbaycan yığması arasında keçirilən oyundan sonra hər iki komandanın baş məşqçisi matçla bağlı fikirlərini bildirib. Azerisport.az xəbər verir ki, komandamızın minimal hesablı məğlubiyyəti ilə başa çatan qarşılaşmadan sonra çalışdırıcılar bunları söyləyib:

 

Turqay Semercioğlu (Şərq region yığmasının baş məşqçisi): “Qardaş ölkənin komandası ilə qarşılaşdığımız üçün çox şadıq. Hər iki yığma qələbəyə layiq idi. Azərbaycan yığması əlverişli imkanları qola çevirə bilmədi. Həqiqətən də, bəxt bu gün bizim tərəfimizdə idi. Qələbə qazandığımız üçün çox xoşbəxtik. Azərbaycan yığmasına uğurlar arzulayıram”.

 

Təbriz Həsənov (Azərbaycan U-17-nin baş məşqçisi): “Qələbə ilə başa vura biləcəyimiz bir turniri xoş notlarla bitirə bilmədik. Əvvəlki oyunlarda olduğu kimi, yenə də təhlükəli vəziyyətləri qola çevirməkdə çətinliklərlə üzləşdik. Oyun ərzində ərazi üstünlüyünə malik olsaq da, əks-hücumda qol buraxdıq. Son dəqiqədə isə penaltidən yararlana bilmədik. Səhvlərimizin üzərində işləyib daha yaxşı oynamağa çalışacağıq”.