17 mart 2011 01:38
Real 1/4 finala darmadağınla, Chelsea qolsuz adladı (YENİLƏNİB)
Çempionlar Liqasının 1/8 final mərhələsinin cavab oyunlarına yekun vurulub. Azerisport.az xəbər verir ki, bu mərhələnin 4 görüşü ötən həftə keçirilsə də, qalan 4-ü də bu həftə oynanılır.
İlk oyun günündə ötən mövsümün finalçıları münasibətlərinə aydınlıq gətirib. Birinci oyunda səfərdə minimal hesablı qələbə qazanmış “Bayern” ÇL-in son qalibini titulsuz qoymağa yaxın olsa da, bu şansdan yararlana bilməyib. Hər halda “İnter”i çətin səfər oyununda məğlub edən almanlar doğma meydanda gözlənilməz də olsa, 1/4 finala çıxa bilməyiblər. "İnter" isə əsl çempiona layiq əzmkarlıq göstərərək, növbəti mərhələyə vəsiqə qazanıb. Günün digər görüşü isə ilk oyunda qolsuz bərabərliyə razılaşan “Manchester United”lə Marsel “Olympique”i arasında baş tutub. Meydan sahiblərinə mütləq qələbə qazanmaq lazım idi ki, onlar bu vəzifənin öhdəsindən gələ biliblər. Fransızlar isə hətta məhsuldar heç-heçə sayəsində də növbəti mərhələyə adlamaq imkanına malik olmasına rəğmən, onların bu arzusunu həyata keçirməyə cəmi 1 qol yetməyib.
Son oyun günündə isə diqqətlər daha çox “Real” ilə Fransanın digər “Olympique”i arasındakı qarşılaşmaya yönəlmişdi. Lion təmsilçisi ilk oyunda bərabərə qaldığı rəqibi ilə dueldə sürpriz etmək istəsə də, buna ola bilmədi. Əksinə 3 cavabsız qola sevinən Joze Mourinyonun komandası yoluna darmadağınla davam etdi. “Chelsea” isə ilk oyunda 2 cavabsız qol vurduğu “Copenhagen”in işini elə səfərdə bitirdiyindən, cavab görüşü demək olar ki, formal xarakter daşıyırdı. Məhz bu üzdən idi ki, Londondakı qarşılaşmada tərəflər elə qolsuz heç-heçə ilə kifayətlənməli oldular.
Maraq üçün qeyd edək ki, ötən həftə “Tottenham” (İngiltərə), “Barcelona” (İspaniya), “Shakhtar” (Ukrayna) və “Schalke” (Almaniya) 1/4 finala çıxan ilk komandalar olmuşdu.
Çempionlar Liqası
1/8 final, cavab oyunları
15 mart
Bayern (Münhen, Almaniya) – İnter (İtaliya) - 2:3 (ilk oyun, 1:0)
Qollar: Qomes, 21, Müller, 31 - Eto`o, 3, Sneyder, 64, Pandev, 88.
Manchester United (İngiltərə) – Olympique (Marsel, Fransa) - 2:1 (0:0)
Qollar: Ernandes, 5; 75 - Braun, 82-öz qapısına.
16 mart
Chelsea (İngiltərə) – Copenhagen (Danimarka) - 0:0 (2:0)
Real (İspaniya) – Olympique (Lion, Fransa) - 3:0 (1:1)
Qol: Marselo, 37, Benzema, 66, Di Mariya, 76.
