15 mart 2011 13:40
Beşiktaş Şusterlə yollarını ayırdı
Türkiyənin “Beşiktaş” klubu baş məşqçisi Bernd Şusterlə yollarını ayırıb. Azerisport.az xəbər verir ki, bu gün istefa qərarını rəhbərliyə təqdim edən almaniyalı mütəxəssisin qərarı klub prezidenti Yıldırım Demirörən tərəfindən müsbət qarşılanıb və beləcə “qara qartal”da Şuster dönəmi arxada qalıb.
Uğursuz çıxış edən komandada qalmaq istəmədiyini bildirən Şuster bu gün səhər məşqi zamanı futbolçularıyla da vidalaşıb. Onun işini isə mövsümün sonuna kimi köməkçi məşqçi Tayfur Havutçunun həyata keçirəcəyi bildirilir.
Qeyd edək ki, Şuster “Beşiktaş”a cari mövsümün əvvəlində gətirilmişdi. O, xüsusilə
UEFA Avropa Liqasının cari mövsümündəki uğurlu çıxışla “Beşiktaş”ı Türkiyənin ən layiqli təmsilçisinə çevirmişdi. Klub rəhbərliyinin qışda bir neçə ulduz oyunçunu heyətinə qatmasından sonra “ağ-qaralar”ın daha qarşısıalınmaz olacağı gözlənilsə də, hər şey tərsinə cərəyan etdi. Çempionatdakı hər oyunda uduzan “Beşiktaş” Avroliqa ilə də biabırçı yenilgilərlə vidalaşdı. Məhz bu uğursuzluqlardan sonra almaniyalı mütəxəssisin komandaya heç bir fayda vermədiyi dəqiqləşdi və nəticədə də ona getməkdən başqa çıxış yolu qalmadı.
