15 mart 2011 20:34
Toni Adams: Bunları ingilis jurnalistlər özlərindən uydururlar
Toni Adamsın “Qəbələ”nin baş məşqçisi olmasından sonra ona qonşu ölkələrdən, keçmiş MDB ölkələrindən kifayət qədər böyük maraq var. Azerisport.az məhz qonşu Rusiyadan olan jurnalistlərin ondan aldığı son müsahibəni təqdim edir.
Maraq üçün qeyd edək ki, Britaniya mətbuatı Toni Adamsın hazırkı işindən yazarkən, onun burdakı şəraitinin ürəkaçan olmamasından, Qəbələdə darıxdırıcı həyat sürməsindən, həmyerlilərinin ölkəmizdə heç nəyə nail ola bilməyəcəyindən yazır. İngiltərəli mütəxəssis rusiyalı həmkarlarımıza müsahibəsində isə bunların hamısını təkzib edib:
“Mən bu haqda heç nə deməmişəm. Sadəcə ingilis jurnalistlər həmişəki kimi özlərindən uydurublar. Halbuki, mənim komandanı sıfırdan yığıb, istədiyim kimi formalaşdırmaq çox xoşuma gəlir. Bu çox əladı. Burdakı işim sırf mən istəyən kimidi. Mən “Qəbələ”də baş məşqçilikdən əlavə faktiki olaraq texniki və idman direktoru vəzifələrini yerinə yetirirəm. Bu, mənim üçün çox böyük təcrübədi. Məndən tez-tez soruşurlar ki, sən Qəbələdə darıxmaqdan ölmürsən ki? Ancaq mənim burda darıxmağa vaxtım olmur. Çünki səhərdən axşama kimi işləyirəm. Və ən vacibi odu ki, mən rəhbərlik tərəfindən hər cür dəstək görürəm. Ferqyuson mənim haqqımda belə demişdi: “Toni, öz klubunu tapmağa çalışma. Öz prezidentini tap”. Bu planda “Qəbələ” mənim üçün ən ideal variantdı”.
- Sizin burda 5-10 il qalacağınıza dair dedikləriniz nə dərəcədə doğrudu?
- Bunu da ingilis jurnalistlər fikirləşiblər. Mən elə deməmişəm. Hər şey çox sadədi. Mənim “Qəbələ” ilə 3 illik müqaviləm var. Bu müddətdə biz stadion tikməliyik, çempionluğu qazanmalıyıq. Ən əsası isə mənsiz də uğurlu fəaliyyətini davam etdirə biləcək klub yaratmalıyıq. Sonra isə mən Avropaya qayıtmaq istəyirəm. Hansı ki, bütün təşkilatçılıq işləri yüksək səviyyədə olsun, mənsə sadəcə sırf məşqçilik işimlə məşğul olum.
- Zaqafqaziyada qonağı adətən spirtli içkilərə qonaq edərlər. Sizə burda işləmək çətin deyil ki?
- Amma mənə belə şey təklif etmirlər. Çünki yaxşı bilirlər ki, Toni Adams içsə, necə dəhşətli olar (gülür). Kimsə mənimlə qeyri-rəsmi şəraitdə söhbət etmək istəsə, onunla çay da içə bilərəm. Hansı ki, burda o, çox dadlıdı. Demək olar ki, 14 ildən çoxdu ki, içmirəm.
