18 mart 2011 01:55
Portuqaliyada 3 qat bayram, İngiltərədə şok (YENİLƏNİB)
Avropa Liqasının 1/8 final mərhələsinin cavab oyunları keçirilib. Azerisport.az xəbər verir ki, Çempionlar Liqasından fərqli olaraq, qitənin nüfuzuna görə ikinci dərəcəli turnirinin bütün görüşləri eyni günə təsadüf edib.
Cütlər arasında kifayət qədər maraqlı rəqiblər vardı ki, bunlar arasında xüsusilə Rusiya və Hollandiya klublarının rəqabəti diqqət çəkirdi. Hər halda 1/4 finala vəsiqə uğrunda bu ölkənin 2 klubu bir-biri ilə mübarizə aparırdı. İlk oyunda 3 cavabsız qolla məğlub olan “Zenit”in işi kifayət qədər çətin idi. Luçano Spallettinin komandası növbəti mərhələyə vəsiqə qazanmaq üçün 4 cavabsız qol vurmalıydı. Lakin bunlardan yalnız ikisinə gücü çatan Peterburq klubu mübarizəni dayandırmalı olub. Digər Rusiya klubu - Moskva “Spartak”ı isə əksinə səfərdə qalib gəldiyi “Ajax”ı doğma meydanda da darmadağın etməklə, yoluna davam edib.
Bu mərhələdə 3 klubla təmsil olunan Portuqaliya ilk oyunlar zamanı "Braga"nın evdə "Liverpool", "Porto"nun isə səfərdə Moskva CSKA-sı üzərində minimal hesablı qələbəsinə sevinmişdi. Onların bu üstünlüyünü nə dərəcədə qoruyub saxlayacağı maraqla gözlənilirdi. "Braga" 90 dəqiqə ərzində gözəl müdafiə olunmaqla "Liverpool" ilə dueldə böyük sensasiyaya imza atıb. "Porto" isə cavab oyununda da qələbə qazanmağı bacarıb. Portuqaliyanın daha bir klubu "Benfica" isə PSG üzərində əzmkar qələbə qazanmışdı ki, cavab görüşündə də heç-heçə etməklə, rəqibini yolundan kənarlaşdırıb.
Yeganə Almaniya təmsilçisi "Bayer" ilk oyunda evdə uduzduğu "Villareal"la görüşdə möcüzəyə ümid bəsləsə də, heç nə edə bilməyib. İngiltərə nəhənglərindən "Manchester City" isə "Liverpool" kimi çıxışını dayandırmalı olub. Mançininin komandası ilk oyunda 2 cavabsız qolla məğlub olduğu “Dinamo”nun sensasiyanı rəsmiləşdirməsinə mane ola bilməyib.
Avropa Liqası
1/8 final, cavab oyunları
17 mart
Manchester City (İngiltərə) - Dinamo (Kiyev, Ukrayna) - 1:0 (ilk oyun, 0:2)
Qol: Kolarov, 39.
PSG (Fransa) - Benfica (Portuqaliya) - 1:1 (1:2)
Qollar: Bodmer, 35 - Qaytan, 27.
Spartak (Moskva, Rusiya) - Ajax (Hollandiya) - 3:0 (1:0)
Qollar: Kombarov, 21, Velliton, 30, Aleks, 54.
Zenit (Rusiya) - Twente (Hollandiya) - 2:0 (0:3)
Qollar: Şirokov, 16, Kerjakov, 37.
Porto (Portuqaliya) - CSKA (Moskva, Rusiya) - 2:1 (1:0)
Qollar: Halk, 1, Quarin, 24 - Tosiç, 29.
Liverpool (İngiltərə) - Braga (Portuqaliya) - 0:0 (0:1)
Rangers (Şotlandiya) - PSV (Hollandiya) - 0:1 (0:0)
Qol: Lens, 13.
Villarreal (İspaniya) - Bayer (Almaniya) - 2:1 (3:2)
Qollar: Kasorla, 33, Rossi, 61 - Derdiyok, 82.
