18 mart 2011 16:18
Avroliqanın da püşkü atıldı (YENİLƏNİB)
Bu gün Avropa Liqasında da 1/4 final və yarımfinal mərhələsinin püşkatma mərasimi keçirilib. Azerisport.az xəbər verir ki, qitənin nüfuzuna görə ikinci dərəcəli turnirindəki 8 ən güclü komanda da finala gedən yoldakı bütün rəqiblərini tanımış olub.
İsveçrənin Nyon şəhərində baş tutan tədbir Bakı vaxtı ilə saat 16:00-da başlayıb. Qeyd edək ki, artıq bu mərhələdən etibarən komandaların hamısı bir-birinə rəqib olmaq imkanına malik idi. Yəni “kor püşk” 3 klubla təmsil olunan portuqalları, eləcə də 2 klubla təmsil olunan hollandları üz-üzə qoya bilərdi. Lakin ÇL-dən fərqli, bu turnirdə belə təsadüf qeydə alınmayıb və onlar müxtəlif ölkə təmsilçiləri ilə düşüb.
Avropa Liqasının 1/4 finalına yüksələn komandalar bunlardı:
1. Benfica (Portuqaliya) - PSV (Hollandiya)
2. Porto (Portuqaliya) - Spartak (Moskva, Rusiya)
3. Braga (Portuqaliya) - Dinamo (Kiyev, Ukrayna)
4. Villarreal (İspaniya) - Twente (Hollandiya)
Yarımfinalda isə bu komandalar aşağıdakı cütlüklərlə mübarizə aparmalı olacaq:
4-cü cütun qalibi - 2-ci cütün qalibi
1-ci cütün qalibi - 3-cü cütün qalibi
Qeyd edək ki, yuxarıdakı bütün cütlüklərdə adı birinci göstərilən komandalar ilk oyunda ev sahibi olacaq. Avropa Liqasında 1/4 final mərhələsinin ilk oyunları aprelin 7-də, revanş qarşılaşmaları isə 14-də baş tutacaq. Yarımfinalın ilk matçları aprelində 28-də, cavab görüşləri isə mayın 5-də oynanılacaq. Avroliqanın final görüşü isə mayın 18-də “Dublin Arena”da baş tutacaq.
