20 mart 2011 12:07
Julius Vobay: Neftçi yeganə favorit deyil
“Xəzər Lənkəran”ın yarımmüdafiəçisi Julius Vobay Premyer Liqanın 24-cü turunun “Neftçi” ilə oyunundan (1:1) sonra azerisport.az saytının suallarını cavablandırıb.
- “Neftçi” ilə ikinci ardıcıl ev oyununda qeydə alınan qollu heç-heçə haqqında nə deyə bilərsiz?
- Hər halda bu oyunu bizim hesabımıza yazmaq olar. Demək olar ki, 90 dəqiqə oyuna nəzarəti əlimizdə saxladıq. Məğlub olsaydıq, çox ədalətsiz nəticə olardı. Bizi hətta heç-heçə də qane etmirdi.
- Əgər hakimin təyin etdiyi penalti olmasaydı, XL uzun fasilədən sonra əzəli rəqibinə məğlub olmuş olacaqdı...
- Orda penalti var idi. Hakim cərimə meydançasındakı kobudluğu düzgün qiymətləndirdi. Xoşbəxtlikdən biz yenə “Neftçi”yə uduzmadıq və ümidvaram ki, heç vaxt uduzmarıq.
- Penalti nöqtəsinə yaxınlaşarkən, hansısa həyəcan yox idi? Axı bütün tribunalar həyəcanla ancaq qol gözləyirdi...
- Həyəcan mənim üçün yaddı. Mən həmişə özümü vaxtında sakitləşdirməyi bacarıram. Odu ki, penalti nöqtəsinə də soyuqqanlı yaxınlaşdım və özümə dedim ki, bacardığın kimi vur.
- Məgər siz XL-ın ştatlı penalti vuranısız?
- Xeyr. Sadəcə həmin vaxt ştatlı penalti vuran futbolçumuz meydanda deyildi. Buna görə d mən vurmalı oldum. Qətiyyən həyəcanlanmadım və bildim ki, vuracam.
- Özünüzü qəhrəman hesab edirsiz?
- Yox, siz nə danışırsız. Mən bunu vurmağa borclu idim. Evdə uduzmağımız düz deyildi.
- Əgər uduzsaydız, “Neftçi” ilə xal fərqiniz 7-yə çıxacaqdı...
- Gördüyünüz kimi, bu, baş vermədi. Əgər uduzsaydıq da belə, çempionluq şanslarımız azalmayacaqdı. İndi isə sadəcə 4 xal geri qalırıq. Qarşıda 8 tur var. Çoxlu dəyişikliklər olacaq.
- XL-ın iki ardıcıl ev oyununda “Neftçi”ni məğlub edə bilməməsi sizi narahat etmir ki?
- Xeyr. Çempionat hələ qurtarmayıb. Baxın, “Qarabağ” necə irəliləyir. Onların indiki xal ehtiyatı bizimki ilə bərabərdi. Odu ki, “Neftçi” yeganə favorit deyil.
- Yeri gəlmişkən, indi ikinci pillədə məhz “Qarabağ” gedir...
- Bunda xüsusi problem görmürəm. Onlarla da iki oyunumuz qalır.
- Hakimliyi necə dəyərləndirərdiz?
- Mən ümumiyyətlə, başa düşmürəm ki, belə böyük oyunlara niyə əcnəbi hakimlər gətirmirlər? Axı onlar heç nədə maraqlı olmurlar. Daha obyektiv idarəçilik edərlər. Əminəm ki, onda çox şey başqa cür olardı. Deməzdm ki, hakimlər kiməsə kömək edir, amma hər halda belə təsəvvür yaranır.
- Siz driblinqləri sevirsiz. Bizim çempionatda bunu etmək nə dərəcədə asandı?
- Azərbaycan çempionatının səviyyəsi mənim xoşuma gəlir. Ancaq driblinq etmək üçün məkan baxımından Rumıniyada da, burda da eyni çətinliklər var. Premyer Liqanın müdafiəçiləri heç də nəzakətli deyillər.
