22 mart 2011 15:09
Belçika yığması daha bir futbolçusunu itirdi
AÇ-2012-nin seçmə mərhələsində Azərbaycan millisinin rəqiblərindən olan Belçika yığmasında zədə epidemiyası davam edir. Azerisport.az xəbər verir ki, martın 29-da Berti Foqtsun yetirmələrini qəbul edəcək Jorj Leekensin komandası daha bir itki ilə üzləşib.
Belə ki, rəqibimizin hücumçusu Byuren Vleminks də sıradan çıxıb. NEK-in şərəfini qoruyan futbolçunun zədəsinin ciddi olduğu və qarşıdakı Avstriya (25 mart) və Azərbaycanla (29 mart) görüşlərdə komandasına kömək edə bilməyəcəyi bildirilir.
Qeyd edək ki, belçikalıların düşərgəsində onunla yanaşı Nikolas Lombertsin də millimizlə görüşdə iştirakı sual altındadı. Maruan Fellaini, İqor de Kamarqo, Tomas Vermalen, Conatan Lejar, Kristof Lepuana və Olivye Deşaxt isə bu səbəbdən heç əsas komandaya dəvət olunmayıblar.
