22 mart 2011 16:03
Hakimlər Xəzər Lənkəran`ı sonuncu etdilər
Azərbaycan Premyer Liqasının XXIV turu “Xəzər Lənkəran” üçün əlamətdar olub. Azerisport.az xəbər verir ki, mövsüm ərzində ilk dəfə “Xəzər Lənkəran”ın lehinə penalti qərarı verildi.
“Neftçi” ilə matçda penalti zərbəsini dəqiq yerinə yetirən Julius Vobay mövsüm ərzində ilk 11 metrlik zərbənin müəllifi oldu və dəqiq yararlandı.
Bu komandanın ifasında sonuncu penalti isə ötən ilin aprelində vurulmuşdu. Həmin çempionatın 29-cu turunun “İnter”lə görüşündə İvan Svetkov 11 metrdən qapını dəqiq nişan almışdı. Aprelin 23-dəki görüşdən təxminən 11 ay, daha dəqiqi 329 gün sonra hakimlər “Xəzər Lənkəran”ın penalti vurmasına imkan verdilər.
Penaltilərlə bağlı daha 1 məqam isə Premyer Liqanın əvvəlki 23 turu ilə bağlıdı. “Xəzər Lənkəran”ın “siftə etdiyi” XXIV tura qədər hakimlər 22 penalti təyin etmişdi. XL-dan başqa hər klub ən azı 1 dəfə belə imkan qazanmışdı. Həmin 11 klubun zərbə sayı isə belə idi: “İnter” – 4, “Neftçi”, “Qəbələ” – 3, “Muğan”, “Gəncə”, “Simurq”, “Turan” – 2, AZAL, MOİK, “Qarabağ”, “Bakı” – 1 dəfə. Göründüyü kimi “Xəzər Lənkəran” bu siyahıya hamıdan sonuncu – 12-ci qoşuldu.
