23 mart 2011 13:01
Berti Foqtsdan millimizin üzvlərinə bayram sovqatı
AÇ-2012-nin seçmə mərhələsi çərçivəsində martın 29-da səfərdə Belçikanın qonağı olacaq Azərbaycan millisi hazırlıqlarını davam etdirir. Azerisport.az xəbər verir ki, yığmamızın üzvləri baş məşqçi Berti Foqtsun rəhbərliyi altında onun vətənində hazırlaşır
Komandamız Düsseldorfda məskunlaşıb. Almaniyalı mütəxəssis yetirmələrini gündə iki məşqə çıxarır ki, həmin hazırlıq proseslərində də futbolçular əsasən topla cəld və sürətli çalışmalara üstünlük verirlər.
Günün ilk məşqləri daha çox oyunçuların sürət və koordinasiya kerfiyyətlərinin artırılmasına xidmət edir. Axşam məşqlərində isə futbolçular daha çox toplu çalışmalara üstünlük verirlər.
Novruz bayramı günü Berti Foqts yetirmələrinə hədiyyə etməyi də unutmayıb. Belə ki, almaniyalı mütəxəssis Almaniya Bundesliqasının son turunun “Bayer” – “Schalke” görüşünə bilet təşkil edərək, millimizin üzvlərinə bu görüşün həyəcanını yaşadıb. Qarşılaşma isə, məlum olduğu kimi 2:0 hesabıyla meydan sahiblərinin xeyrinə başa çatıb.
Lakin hazırlıq prosesində futbolçularımızı üzən məqamlar da var. Belə ki, komandamızın məskunlaşdığı otelin interneti çox pis işlədiyindən, milli üzvləri ən populyar hobbilərindən kənar qalıblar. İndi onlara həftəsonu yollanacaqları Belçikada elə problemlə üzləşməyəcəklərinə inanmaq qalır. Axı 29-da bu ölkənin yığmasıyla vacib görüşə çıxacaq futbolçularımız hazırlığın qalan hissəsini məhz Brüsseldə davam etdirəcəklər.
