23 mart 2011 17:01
Şükürovun komanda yoldaşını bananla təhqir etdilər
Millimizin üzvü Mahir Şükürovun çıxış etdiyi, Vaqif Sadıqovun məşqçi kimi çalışdığı Rusiyanın “Anji” klubunun braziliyalı futbolçusu Roberto Karlos irqçi ayrı-seçkiliyə məruz qalıb. Azerisport.az xəbər verir ki, hadisə Premyer Liqanın ikinci turunun “Zenit”lə Sankt-Peterburqda keçirilən səfər oyunu zamanı baş verib.
Belə ki, yerli azarkeşlər ünlü futbolçuya banan göstərməklə, bir növ onu təhqir etməyə çalışıblar. Oyundan sonra mətbuata açıqlama verən Rusiya Futbol İttifaqının rəsmisi Alı Alxanov bu hadisəyə münasibət bildirərkən, Sankt-Peterburq klubunu günahlandırıb: “Bu təhqirdi. RFF-nin belə olaylara münasibəti kəskindi. Heç bir futbolçunun şəxsiyyəti və milliyəti alçaldıla bilməz. Biz buna yol verməyəcəyik. Ev sahbi komanda daxil olmaqla günahkarlar cəzalandırılacaq”.
Bu mənada “Zenit”ə çeşidli cəzaların kəsilməsi gözlənilir ki, bunların da arasında komandanın 3 xalının silinməsi, stadionun bağlanılması və sair kimi cəzalar var.
Qeyd edək ki, “Anji” bu görüşdə rəqibinə 0:2 hesabı ilə məğlub olmuşdu.
