25 mart 2011 15:25
Emin İmaməliyev: Avropada ancaq müdafiə haqda düşünən 2-3 yığma qalıb
“Qarabağ”ın yarımmüdafiəçisi Emin İmaməliyev azerisport.az saytına müsahibəsində millimizin qarşıdan gələn Belçika ilə AÇ-2012-nin seçmə mərhələ oyunundan danışıb.
- Çox az adam millimizin Brüsseldən uğurlu nəticəylə dönəcəyinə inanır. Bəs siz necə?
- Bu, çox pisdi. İstərdim ki, komandamıza inansınlar. Əlbəttə, komandaların səviyyəsi fərqlidi, amma bu, futboldu. Hər şey ola bilər. Komandaya inanmaq lazımdı. Rəqib elə də güclü komanda deyil. Mən onların bəzi oyunlarına baxmışam. Yaxşı və gənc komandadı. Amma xüsusi heç nə göstərmirlər.
- Sizin sözlərinizdən belə nəticəyə gəlmək olur ki, möcüzə gözləməyə dəyər...
- Futbolda möcüzə olmur. Hər şey zərurətdən doğur. Əsas odu ki, bu gün kimin bəxti gətirə bilər. Bəli, onlar bu gün güclüdü. Ancaq biz heç də onlardan qorxmamalıyıq. 90 dəqiqə ürəkdən mübarizə aparmaq lazımdı.
- Belçika ilə 5 il öncəki oyunu xatırlayırsız?
- Bəli, biz onda 0:3 uduzduq. Halbuki, oyuna pis başlamamışdıq. Öz səhvlərimizdən uduzduq. Standart vəziyyətlər həlledici oldu. Bu, ümumiyyətlə rəqibimizin ən güclü tərəfidi.
- Belçikalı futbolçularla mübarizə aparmaq nə dərəcədə çətindi?
- Əsas odu ki, qorxmayasan. Bizim istənilən oyunçumuz onlarla uğurla mübarizə apara bilər. Qətiyyən arxayınlaşmaq olmaz. Rəqib bundan dərhal yararlana bilər.
- Son 5-6 ildə belçikalılar kifayət qədər gücləniblər. Bəs bizim yığmamızdakı dəyişiklikləri necə qiymətləndirərdiz?
- Böyük fərq görmürəm. Müsbət dəyişikliklər var, amma qeyd olunası xüsusi heç nə yoxdu. Komandamızda gənc oyunçular peyda olub ki, bu da təbii olaraq müsbət qarşılanmalıdı. Əgər seçmə mərhələdə 10-12 xal toplaya bilsək, onda bu, başqa məsələ. 4-5 xalı elə bizim yerli məşqçilər də qazana bilirdilər.
- Sizcə, komandamız hansı taktika ilə oynamalıdı?
- 5 il öncə biz 4-5-1 taktikasıyla çıxmışdıq. Hər məşqçinin öz taktikası olur. Əgər 90 dəqiqə qapıda oturacaqsansa, heç nə qazanmayacaqsan. İstənilən halda 1-2 səhv buraxmalı olursan və rəqib də bundan yararlana bilər. Artıq Avropada 2-3 komanda qalıb ki, ancaq müdafiə olunmaq haqda düşünür. Qalan bütün komandalar fəal hücum qurmaq barədə düşünür, uğuru bunda görür.
- Müdafiəyəmeylli taktika səfər oyunlarında işə yaraya bilər. Bu oyunda riskə getməyə ehtiyac var?
- Ola bilsin ki, baş məşqçi də bu haqda düşünür. Məğlubiyyət məğlubiyyətdi, Hansı hesabla uduzsan da, eyni şeydi. Fikrimcə, risk etməyə dəyər. Əgər hücuma atılsaq, rəqib də bundan qorxuya düşə bilər.
