25 mart 2011 16:32
“İngilis futbolunu Azərbaycanda tətbiq etmək qeyri-mümkündü”
Toni Adamsın köməkçisi Qari Stivens ingilis futbolunu bütövlükdə “Qəbələ”yə aşılamaq fikrində olmasa da, komandanın heyətində ciddi dəyişikliyin ola biləcəyini deyir. Azerisport.az ingilis mütəxəssislə müsahibəni sizlərə təqdim edir:
- Sizin vəzifəniz baş məşqçi köməkçisidi. Toni Adamsa, konkret olaraq, nədə kömək edirsiz?
- İşim, adından da göründüyü kimi, baş məşqçiyə yardım etməkdi. Komandanın hazırlığı ilə bağlı bütün məsələlərdə ona əlimdən gələn köməyi edirəm. Lazım gəldikdə ayrı-ayrı futbolçuların fərdi məşq prosesinə nəzarət etmək də mənim birbaşa səlahiyyətimdi. Bir sözlə, vəzifəm “Qəbələ”də Toni Adamsın işini yüngülləşdirməkdi.
- Baş məşqçi və siz İngiltərə futbol məktəbini təmsil edirsiz. Uğur qazanmağın yolunu nədə görürsüz - “Qəbələ”də ingilis futbolunu tətbiq etməkdə, yoxsa sadəcə, Azərbaycanda yaxşı oynayan bir komanda yaratmaqda?
- Hesab edirəm ki, ingilis futbolunu bütövlükdə Azərbaycana gətirmək və burda hansısa komandaya tətbiq etmək qeyri-mümkündü. Çünki Azərbaycanın öz futbol məktəbi, ənənləri var. Amma ingilis futbolunun müəyyən elementlərini, yaxud da xüsusiyyətlərini tətbiq etmək istərdik.
- “Qəbələ” ilk altılığa düşə bilmədi. Bu, komandanın ümumi planına necə təsir edəcək?
- Baş məşqçi köməkçisi kimi şəxsən mən çox istərdim ki, “Qəbələ” ilk altılığa düşsün. Amma istəyimizə çata bilməmişiksə, bunu faciəyə çevirmək lazım deyil. Bu il “Qəbələ” üçün keçid dövrüdü. Başladığımız işin bəhrəsini gələn il götürəcəyik. Gələn il artıq bizim işimizə qiymət vermək olar.
- Klubun hələ ki müasir tələblərə cavab verən stadionu və bazası yoxdur. Doğrudanmı, bu, yaxşı komanda yaratmağa mane olur?
- Təbii ki, yaxşı stadion və müasir tələblərə cavab verən bazanın olması güclü komanda yaratmağın şərtlərindən biridi. Amma futbolda komandalar meydana bərabər sayda futbolçu ilə çıxır və eyni imkanlara malik olurlar. Futbolçular hansı şəraitdə oynayırsa, həmin şəraitə uyğunlaşmalıdırlar. Yəni yaxşı komanda yaratmaq üçün stadion və baza birinci dərəcəli şərt deyil.
- Yeni ilin əvvəli komandanız üçün o qədər də uğurlu olmadı. Müxtəlif səbəblər göstərilir. Komandanın oyunlarını saf-çürük edən mütəxəssis kimi siz nə fikirdəsiz?
- Deməzdim ki, “Qəbələ”nin oyununda eniş yeni ildən başlayıb. Ötən ilin son iki oyununda AZAL-la heç-heçə oynadıq, “Bakı”ya isə məğlub olduq, cəmi 1 xal qazandıq. Məncə, uğursuzluğu qış tətilindən sonrakı dövrlə, yaxud da yeni transferlərlə bağlamaq düzgün deyil. Dünyanın ən tanınmış klubları belə, bu kimi enişlərdən sığortalanmayıb. İnanıram ki, yaxın zamanda çatışmazlıqları aradan qaldırıb uğursuz günlərimizi arxada qoyacağıq.
- Gələcək planlar haqqında nə deyə bilərsiz? Komandada köklü dəyişikliklər gözlənilirmi?
- Əslində, bütün normal klublar mövsümə bir heyətlə başlayır, bir qədər fərqli heyətlə başa vurur. Bu məsələdə “Qəbələ” də başqa klublardan fəqrlənmir. Əgər indi biz ikinci altılıqda mübarizə aparırıqsa və gələn mövsüm qarşımıza ilk altılığa düşməyi məqsəd qoyacağıqsa, deməli, heyətdə dəyişikliklər olmalıdı.
- Bir mütəxəssis kimi Azərbaycan futbolu haqqında hansı fikirdəsiz?
- Öncə onu deyim ki, bu gün burda, Azərbaycanda çalışmaqdan böyük həzz alıram. Futbola gəlincə, inkişaf istənilirsə, əvvəlcə təməllər qoyulmalıdı. Stadion və meydançaların səviyyəsi yaxşılaşdırılmalıdı. Hər komandanın özünün stadionu, məşq bazası olmalıdı. Hər klubun nəzdində uşaq və yeniyetmə futbolçulardan ibarət komandalar olmalıdı. Məhz bu təməllər olduqdan sonra Azərbaycan futbolu durmadan inkişaf edəcək. Çox arzu edirəm ki, Azərbaycan futbolu böyük nailiyyətlər qazansın.
