25 mart 2011 12:05
Elnur Abdullayev: Mən sadəcə Foqtsun taktiki sxeminə uyğun gəlmirəm
“Xəzər Lənkəran”ın yarımmüdafiəçisi Elnur Abdullayev azerisport.az saytına müsahibəsində yığmaya çağırılmamasına münasibət bildirib, millimizin qarşıdakı Belçika ilə oyunundan, eləcə də öz komandasının çıxışından danışıb.
- Berti Foqtsun Belçika ilə oyun üçün açıqladığı heyətdə adınızın olmamasını necə qarşıladız?
- Nə deyə bilərəm ki? Futbol bununla bitmir. Bu, baş məşqçinin qərarıdı. Mən də ona hörmətlə yanaşıram. Çalışacam ki, “Xəzər Lənkəran”ın əsas heyətində daha çox görünüm. Əgər oyunum Foqtsun xoşuna gəlsə, məni də çağırar.
- Azarkeşlərin də əksəri belə hesab edir ki, siz yığmaya çağırılmalı olan azsaylı futbolçulardan birisiz...
- Mənə bunu eşitmək çox xoşdu. Əlbəttə, Foqts gələn dəfə məni çağıra bilər. Amma mən də layiqli oynamalıyam. Mənim üçün yığma komandada çıxış etmək böyük şərəfdi.
- Foqtsun sözlərinə görə sizin topla rəftarınız yaxşı olsa da, topsuz oynamağı bacarmırsız...
- Bilmirəm. Ola bilər gələcəkdə onun fikri dəyişsin. Fikrimcə, Belçika ilə oyunda komanda daha çox müdafiədən oynamalı olacaq. Mümkündü ki, hazırkı mərhələdə baş məşqçinin taktiki sxeminə uyğun gəlmirəm.
- Bəs bütövlükdə yığmanın oyunu haqda nə deyə bilərsiz?
- Yığmamıza uğurlar arzulayıranm. Minimum heç-heçə gözləyirəm. Bəlkə də bu inanılmaz görünür. Amma mən komandamıza inanıram. Yəqin yadınızdadı ki, bizim Türkiyəyə qalib gələcəyimizə çox az adam inanırdı. Ancaq Azərbaycan bunu bacardı.
- Klubunuzdan danışaq. “Xəzər Lənkəran”ın fasilə dövründəki planları necədi?
- Biz artıq Lənkərana yollanmışıq və ayın sonuna kimi burda hazırlıq keçəcəyik. Qarşıdakı “Bakı” ilə matçda ancaq 3 xal qazanmaq istəyirik. Ümumiyyətlə, bizim üçün hər bir oyun final görüşü kimidi. Elə qarşıdakı oyuna da ancaq qələbə üçün çıxacağıq.
- XL nəhayət, “Bakı”ya qalib gələ biləcəkmi?
- Bu, futboldu, hər şey ola bilər. Mən əlbəttə, düşünmürəm ki, “Bakı”nın çempionluğa şansı var. Amma onların kuboka daha ciddi yanaşdığını demək olar. Bu dəfə artıq biz onları məyus etməliyik. Axı bizim məqsədimiz qızıl dubl etməkdi.
