27 mart 2011 13:44
Qyoko Haciyevski: Brüsseldə xoşbəxtliyi əks-hücumlarda axtarmalıyıq
2007-ci ildə Azərbaycan millisi AÇ-2008-in seçmə mərhələsi çərçivəsində Belçikanı qəbul edərkən, komandamızın baş məşqçisi vəzifəsini makedoniyalı mütəxəssis Qyoko Haciyevski yerinə yetirirdi. “Simurq”un hazırkı baş məşqçisi azerisport.az saytına müsahibəsində martın 29-da keçiriləcək Belçika – Azərbaycan görüşü öncəsi şansları dəyərləndirib.
- Fasilədən istifadə edib vətəninizə gedə bildiz?
- Bəli. Bir neçə günlük də olsa, Makedoniyada oldum. Evdə həmişə yaxşı olur. Amma indi artıq çempionat haqda düşünməliyik.
- Amma biz bu gün sizinlə “Simurq”dan yox, yığma komandamızdan danışmaq istərdik...
- Böyük məmnuniyyətlə. Yeri gəlmişkən, mən də bu oyuna baxmağı böyük maraqla gözləyirəm.
- 2007-ci ildə siz milli komandamızla birgə belçikalılarla üz-üzə gəlmisiz. Həmin oyunu necə xatırlayırsız?
- Bir şeyi qeyd etmək lazımdı ki, o vaxt onlar Bakıya heç də xüsusi motivasiya ilə gəlməmişdilər. Ancaq nəticədə pis oyun sərgiləmədilər. Baxmayaraq ki, qələbəyə daha çox biz layiq idik. Onların qapısı qarşısında kifayət qədər qol vəziyyəti yaratsaq da, dəyərləndirə bilmədik. Öncə Zaur Ramazanovun bəxti gətirmədi, Qomeş əla şansı dəyərləndirə bilmədi, hakim Zaur Tağızadəyə qarşı qayda pozuntusu zamanı təmiz penaltimizi təyin etmədi. Üstəlik hava şəraiti də hücum futbolua sərgiləməyimizə mane olurdu. İkinci hissədə güclü yağış başladı.
- Həmin dövrlə müqayisədə belçikalılarda indi nə dəyişib?
- Martın 25-də keçirilən Avstriya – Belçika matçının sadəcə son 5 dəqiqəsinə baxmaq imkanım oldu. Onların 5-6 əsas heyət oyunçusu bu oyunda iştirak edə bilmirdi. Bütün bunlara baxmayaraq, onlar hamı kimi məni də təəccübləndirdilər. Mənim daha çox xoşuma gələn isə iki qolun müəllifi olan futbolçu oldu.
- Aksel Vitsel...
- Bəli, o. Deyəsən, “Standard”da oynayır. Gözəl komandadı. Mən vaxtilə onlara qarşı oynamışam.
- Vyanadakı nəticə Azərbaycanın Brüsseldəki şanslarına nə dərəcədə təsir göstərdi?
- Əlbəttə, belçikalılar ordan məğlub dönsəydi, komandamızın şansları daha çox olardı. Ancaq indi onlar emosional yüksəlişdədi. Bizə də müdafiədə çox oturmamaq lazım gələcək. Rəqib həmişə hücuma atılanda boş zonalar buraxır. Əks-hücumlar təşkil etməyə hazır olmaq lazımdı. Necə ki, Türkiyə ilə oyunda bunu bacardıq.
- Yəni daha çox hücum etməliyik?
- Azərbaycan millisində Belçikanı təəccübləndirəcək oyunçular var. Məsələn, Rauf Əliyev, Vüqar Nadirov, Vaqif Cavadov. Onlar gəncdilər, cəlddilər. Belçikalıların heyətində problemlər var ki, onlardan yararlanmaq lazımdı. 90 dəqiqə müdafiədə oturmaq bizə heç nə qazandırmayacaq. Amma hücumlar təşkil etməklə, xoşbəxtliyi rəqib qapısı qarşısında axtarmaqla biz meydan sahiblərinə əsl sürpriz yaşada bilərik.
