27 mart 2011 14:40
Emil Mpenza: Millimiz Azərbaycanı məğlub etməyə borcludu
“Neftçi”nin belçikalı hücumçusu Emil Mpenza azerisport.az saytına müsahibəsində Avstriya ilə son oyunlarından danışıb, millimizi Brüsseldə çox çətin görüş gözlədiyini bildirib.
- Bu günlərdə AÇ-2012-nin seçmə oyunları keçirilir. Yığmanızın Avstriya ilə oyununa baxdınız?
- Bəli, Avstriya – Belçika oyununu mən də izlədim. Səfərdə çıxış etsələr də, əla oyun sərgiləyib, layiqli qələbə qazandıq. 2:0 hesabı Belçikanın real gücünü göstərir. Halbuki, onlar daha çox qol vura bilərdi. Hesab edirəm ki, bu qələbə mənim ölkəm üçün çox vacib idi. İndi artıq Belçika qrupda ikinci yer uğrunda mübarizə apara bilər. Aydın məsələdi ki, birinci yer Almaniyanındı.
- Qrupumuzun ikinciliyi uğrunda mübarizə aparan daha bir iddialı komanda var – Türkiyə...
- Son oyunlardakı məğlubiyyətlər bu komandanın işini çətinləşdirib. Onlar çoxlu xal itiriblər. Əlbəttə, Türkiyənin ikinci yer üçün oynadığını da heç kim unutmur. Fikrimcə, ikinci yer uğrunda məhz Türkiyə və Belçika yığmaları mübarizə aparacaq. Belçika üzərində qələbə məni də çox sevindirdi. Onlara gələcək oyunlarında da uğurlar arzulayıram.
- Martın 29-da Belçika yığması Azərbaycan millisini qəbul edir...
- Çox maraqlı oyun olacaq. Belçika doğma meydanda daha yaxşı oyun sərgiləyir. Buna görə də Azərbaycanı çox çətin qarşılaşma gözləyir. Özü də belçikalılara artıq xal itirmək olmaz. Əgər bizim yığmamız AÇ-nin final mərhələsinə qatılmaq istəyirsə, bütün görüşlərdə qələbə qazanmağa borcludu.
- Sizcə, yığmamızın şansları nə dərəcədə yüksəkdi?
- Hər şey hansı futbolçuların oynamasından asılı olacaq. Belçikanın Avstriyaya qarşı oyunu mənim çox xoşuma gəldi. Elə sizin yığmanızda da Türkiyə üzərindəki qələbədən sonra əla motivasiya var.
- Bu dəfə siz yığmaya çağırılmamısız. Bəs, cavab oyununa dəvət almaq şansını necə qiymətləndirirsiz?
- Məlum olduğu kimi, zədə səbəbindən yığmaya da dəvət olunmadım. Amma ümid edirəm ki, cavab matçında oynaya biləcəm. Əgər dəvət etsələr, yığmamızın AÇ-nin final mərhələsinə düşməsi üçün əlimdən gələni edəcəm. Əgər sentyabrın 2-də Bakıda Azərbaycana qarşı oynaya bilsəm, çox əla olar. Bu, həm Azərbaycan millisi, həm də “Neftçi”nin imicinə müsbət təsir göstərə bilər. Ümid edirəm ki, bu, baş verəcək.
- Siz “Neftçi”nin bir neçə vacib oyununda forma geyə bilmədiniz...
- Mən həmin vaxt Belçikada bərpa dövrünü keçirirdim. Hazırda isə komandayla birgə hazırlıqlara başlamışam. Komandamın mənim olmadığım dövrdə liderliyini davam etdirməsinə çox sevindim. Bizim çempionluq üçün gözəl şansımız var. Mən də əlimdən gələni edəcəm ki, “Neftçi”dəki ilk mövsümümdə çempion olum.
- Növbəti turda sizi “Qarabağ”la oyun gözləyir...
- Bu, çox güclü rəqibdi. Amma biz çempion olmaq istəyiriksə, bütün rəqiblərimizə qalib gəlməliyik. “Neftçi” öz oyunuyla birinci yerə layiq olduğunu isbatlayır. Mən heyətə dönməyi və komandama kömək etməyi çox arzulayıram. Hesab edirəm ki, qalan bütün görüşlərimiz çətin olacaq. Amma komandamız bütün bu oyunlara hazırdı.
