28 mart 2011 01:05
Berti Foqts Belçika ilə oyun üçün start heyətini müəyyənləşdirdi
Milli komandamızın baş məşqçisi Berti Foqts artıq AÇ-2012-nin seçmə mərhələsi çərçivəsində sabah keçiriləcək Belçika ilə səfər oyunu üçün heyəti müəyyənləşdirib. Azerisport.az xəbər verir ki, almaniyalı mütəxəssisin sabahkı oyun üçün planlarını müəyyənləşdirməyə komandamızın Brüsseldə dünən baş tutan açıq məşqi şərait yaratdı.
Bütövlükdə heyətdə ciddi və təəccüblü dəyişikliklər yoxdu. Yəni sabahkı oyunun start heyətində bir növ komandamızın əsas özəyini meydanda görə biləcəyik. Bu baxımdan “çərçivə” həmişəki kimi Kamran Ağayevə həvalə olunacaq. Təbii ki, “Qarabağ”da heç də bütün oyunlarda daimi forma geyməyən Fərhad Vəliyevlə və birinci divizion təmsilçisi “Abşeron”da ehtiyatda qalan Andrey Popoviçlə müqayisədə Foqtsun məhz Kamrana üstünlük verməsi tam başadüşüləndi.
Müdafiənin cinahlarında Rail Məlikovla Saşa Yunisoğlu çıxış edəcək. Rəşad Sadıqovla Vladimir Levin isə mərkəzdə rəqibin hücumlarının qarşısını almalıdı. Lakin Levinin mövqeyində Saşa Yunisoğlunun çıxış etməsi də mümkündü. Hər halda hər şey Berti Foqtsun seçimindən və zədə səbəbindən son məşqi buraxan Elnur Allahverdiyevin son durumundan asılı olacaq.
Ruslan Abışovla Rahid Əmirquliyev dayaq yarımmüdafiəçisi funksiyasını yerinə yetirmək tapşırığı alacaq. Artıq zədəsini sağaldan Mahir Şükürov yarımmüdafiənin sağ cinahındakı doğma yerində olacaq. Soldan rəqibin müdafiəsini yarmaq vəzifəsi Vaqif Cavadovun üzərinə düşəcəksə, yeganə hücumçumuz olacaq Rauf Əliyevin arxasında pleymeykerlik funksiyasını Elvin Məmmədov yerinə yetirəcək.
Bir sözlə, komandamızın bu dəfəki matçda da əsas vəzifəsi ilk növbədə qol buraxmamaq olacaq. Millinin düşərgəsində isə oyun ərəfəsində işgüzar və ab-hava hiss olunmaqdadı. Komandamızın üzvləri son məqşdə də istəkli olduqlarını nümayiş etdirdilər. Onların məşq zamanı hətta bir-birinə qarşı kobud oynaması da diqqətlərdən yayınmadı. Epizodların birində Cəmşid Məhərrəmov həmklubu Vaqif Cavadovun ayağına oynadı ki, nəticədə sonuncu həkimin yardımına ehtiyac duydu.
Baş məşqçi Berti Foqts da sakit görüşünüylə diqqət çəkməsinə rəğmən, yetirmələrinə nələrisə başa salmağa çalışırdı. “Rua Boduen” stadionunda komandamızın nəyə nail olacağını isə sabah biləcəyik.
