29 mart 2011 14:29
Nikolas Lomberts: Azərbaycana 10 dəqiqəyə 2 qol vurmaq mümkün deyil
AÇ-2012-nin seçmə mərhələsi çərçivəsində bu gün millimizi qəbul edəcək Belçika yığmasının aparıcı oyunçularından olan müdafiəçi Nikolas Lomberts Azərbaycanla oyun öncəsi jurnalistlərin suallarını cavablayıb. Azerisport.az onunla müsahibəni sizə də təqdim edir.
- Azərbaycanla oyundan nə gözləyirsiz?
- Ancaq qələbə gözləyirəm. Başqa heç nə ola bilməz.
- Avstriyaya qarşı sərgilədiyiniz oyunu göstərə biləcəksiz?
- Siz demək istəyirsiz ki, ilk 10 dəqiqədə 2 qol vurmalıyıq? Mən də buna etiraz etməzdim. Amma düşünmürəm ki, bu, bizdə alınsın.
- Niyə?
- Ona görə ki, Azərbaycan yığması daha müdafiəyəmeylli futbol sərgiləyir, nəinki Avstriya. Onlar öz qapılarına sıxışsa və işimizi çətinə salsa, heç kim deyə bilməz ki, biz neçənci dəqiqədə qol vura bilərik.
- Siz müdafiəçisiz və yəqin ki, işiniz bu oyunda az olacaq...
- Azərbaycan əks-hücumlara bel bağlamalı olacaq. Buna görə də bizə maksimum diqqətli olmaq lazımdı. Onların da heyətində sürətli futbolçular var. Hansı ki, bunu Türkiyə ilə oyunda da göstəriblər.
- Yeri gəlmişkən, həmin oyuna yəqin ki, baxmısız. Təəssüratlarınızı bilmək maraqlı olardı...
- Azərbaycan həmin oyunda türklərin arxayınlaşmasından yararlanaraq qələbə qazandı. Yəqin onlar rəqibi qiymətləndirməyiblər və asan qələbə qazanacaqlarını düşünüblər. Amma nəticədə hər şey fərqli alınır.
- Hansısa nəticə çıxarmısız?
- Türklərə sağ ol deyirəm ki, həmin gün Azərbaycana uduzublar. Nəticədə ilk növbədə biz onları turnir cədvəlində qabaqlamağa nail olduq. İkincisi isə, biz indi dəqiq bilirik ki, Azərbaycana qarşı qətiyyən arxayınlaşmaq olmaz və necə oynamaq lazımdı.
