30 mart 2011 15:39
“Qəbul etməliyik ki, futbolumuz Avropadan qat-qat geri qalır”
Azərbaycan yığmasının və “Neftçi”nin müdafiəçisi Ruslan Abışov azerisport.az saytına müsahibəsində AÇ-2012-nin seçmə mərhələsi çərçivəsində dünənki Belçika məğlubiyyəti (1:4) haqda danışıb.
- Belçikaya böyükhesablı məğlubiyyətin əsas səbəbi nə oldu?
- Əlbəttə, biz bura uduzmağa gəlməmişdik. Heç bunu istəmirdik də. Bizim hamımız ən azı heç-heçəyə köklənmişdik. Ancaq gördüyünüz kimi, uduzduq. Sərgilədiyimiz oyun təəssüf ki, nəticə qazanmağımıza yetmədi. Amma komandamız heç də böyükhesabla uduzmağa layiq deyildi.
- Əgər hesab 1:2olsaydı, yenə normal qəbul olunardı. Amma 1:4 özü hər şeyi deyir...
- Rəqib bizdən güclü idi və bəzi komponentlərdə bizi aşkar üstələyirdi. Onlar daha çox qol vəziyyəti yarada və bunu reallaşdıra bilirdi. Hakimin da meydan sahiblərinə simpatiya bəslədiyi aşkar görünürdü. Məsələn, qayda pozuntusu olmadığı halda cərimə meydançası yaxınlığında qayda pozuntusu qeydə alırdı. Erkən qol bizim üçün çoxlu psixoloji problemlər yaratdı. Baxmayaraq ki, biz də erkən qola tez cavab vermişdik. Əgər Bakıda da belə köklənmə ilə oynaya bilsək, revanşımızı alarıq.
- Hakim başqası olsaydı, nəticə də fərqli ola bilərdi?
- Mən hər şeyi hakimlərin üzərinə atmaq istəməzdim. Həm də gəlin özümüzü aldatmayaq. Qəbul etməliyik ki, Azərbaycan futbolu Avropadan qat-qat geri qalır. Belə oyunlarda futbolçular bunu daha yaxşı anlayır.
- Bu, sizin millidə rəsmi oyunlardakı ilk qolunuz idi...
- Millidə qol vurmaq həmişə xoşdu. Ancaq istərdim ki, bu qol daha yaxşı nəticəyə səbəb olsun. Düzdü, bu qol komandamızı ayıltsa da, penalti bizi sındırdı.
- Bəzi futbolçular heç də öz mövqelərində oynamırdı. Bu, məğlubiyyətdə əsas səbəb ola bilər?
- Bu, baş məşqçinin qərarıdı. Hər bir futbolçu öz mövqeyindən asılı olmayaraq, komandaya maksimum fayda verməyə çalışır. Universal olmaq lazımdı.
