30 mart 2011 11:56
Rəşad Sadıqov: Hakim də belçikalılardan xeyirxahlığını əsirgəmədi
Millimizin kapitanı Rəşad Sadıqov azerisport.az saytına müsahibəsində AÇ-2012-nin seçmə mərhələsi çərçivəsində Belçikaya böyükhesablı yenilgidən (1:4) danışıb.
- Belə oyunlardan sonra danışmaq çox çətindi. Komandada böyük inam var idi ki, burda yaxşı futbol sərgiləyə və vətənə müsbət nəticə ilə dönə biləcəyik. Ancaq meydandakı real güclər göstərdi ki, biz hələ onlarla bərabər səviyyədə çıxış edə bilmirik. Onlar ikiqat bizi üstələyirdilər və layiqli qələbə qazandılar.
- Azərbaycan heç-heçəyə də layiq deyildi?
- İlk 20-25 dəqiqədə göstərdik ki, oynaya bilirik. Fasiləyə də 1:2 hesabı ilə yollanmalı idik. Lakin hər şey tərsinə alındı.
- Brüsseldə belə aqibətlə üzləşəcəyinizi gözləyirdiz?
- Komanda yaxşı nəticəyə inanırdı. Heç mən də karyeramda belə ambisiyalı danışmamışam. Sadəcə penalti və əlavə vaxtda buraxılan qol bizi sındırdı. Heç də yerində olmayan bir qol buraxdıq ki, bu da təsirsiz ötüşmədi. Əgər biz belə rəqiblərlə oyunlarda nəsə etmək istəyiriksə, bu qədər səhvə yol verməməliyik. Belçikanın qələbəsinə kölgə salmaq istəməzdim, amma hakim bəzi epizodlarda onlardan xeyirxahlığını əsirgəmirdi.
- Məgər siz hələ buna öyrəşməmisiz ki, hakim həmişə güclünün xeyrinə qərarlar qəbul edir?
- Belə səviyyəli qarşılaşmalarda adətən obyektiv hakimliklə rastlaşmışam. Finlandiya ilə oyunu yada sala bilərsiz (1:2). Bu oyunda isə hakim elə ilk qayda pozuntusunu bizim əleyhimizə təyin etdi. Onun tez-tez verdiyi belə qərarlar da təsirsiz ötüşmürdü.
- Deməli, bu tsikldə də komandadan heç nə gözləməyə dəyməz?
- Qalan 6 oyundan dördünü biz öz meydanımızda keçirəcəyik. Bu, bizim üstünlüyümüzdü və bir şansdı. Bu tisklin ən vacib matçları da Qazaxıstan yığması ilə oyunlardı. Xüsusilə də səfər oyunu. Orda işimiz heç də asan olmayacaq. Rəqib bizimlə eyni gücdədi. Əgər Avstriya və Belçikaya görə bizi bağışlamaq olarsa, Qazaxıstana yenilsək, bağışlamazlar. Ona görə də, bu məğlubiyyəti unudub artıq almanlarla və qazaxlarla oyunlara hazırlaşmalıyıq.
