31 mart 2011 17:15
Ansi Aqolli: Neftçi ilə oyun bol qollu olacaq
“Qarabağ” “Neftçi” ilə oyunun hazırlıqlarını davam etdirir. Azerisport.az xəbər verir ki, artıq bu gündən etibarən komanda “ağ-qaralar”la oyuna tam heyətlə hazırlaşmağa başlayıb.
Bu arada Albaniya millisinin heyətindən qələbə ilə dönən Ansi Aqolli klubun rəsmi saytına açıqlamasında “Neftçi”ylə oyunöncəsi fikirlərini bildirib: “Milli oyunlar səbəbindən komandamızdan ayrı düşmüşdük. Ona görə də “Neftçi”ylə oyuna istədiyimiz kimi hazırlaşa bilməmişik. Amma inanıram ki, bu amil bakılılarla oyunda özünü göstərməyəcək. Liderə qarşı oynayacağıq. Bu amilin özü elə motivasiya deməkdi”.
Millisinin düşərgəsindən yüksək əhval-ruhiyyədə dönən 28 yaşlı müdafiəçi emosiyalarını bazar gününə saxlayacaq: “Qələbə qazanmaq hər zaman xoş duyğudu. Belaruslarla oyun ölkəmiz üçün çox vacib idi. Təbii ki, vacib qələbəmiz Admirlə mənə əlavə güc verəcək. Həm də axı “Neftçi” üzərində qələbə bizə çempionluq üçün şans yaradacaq. Təbii ki, çempion olmaq istəyirik. Çünki, “Qarabağ”ın buna layiq olduğunu düşünürəm”.
Ansi “Neftçi”də ən təhlükəli oyunçunun Nasimov olduğunu fikirləşir: “Neftçi”nin bu gün lider olmasında Bahodir Nasimovun rolu böyükdü. Özbək forvardı bakılıların ən təhlükəli oyunçusu sayıram. Azərbaycan çempionatında 15 qol vurmaq asan deyil. Düzdü, Nasimov uzun müddətdi qol vura bilmir. Amma o, hərəkətliliyi ilə daim müdafiəçilərə baş ağrısı yaradır. O, işini artıqlamasıyla görür”.
Sol cinah müdafəçisi ancaq qələbə haqqında düşünür: “Oyuna 3 xal üçün çıxacağıq. İnanıram ki, yüksək templi, bol qollu oyun olacaq. Hər halda çempionatın 2 lider komandası oynayacaq. Bu oyunda qələbə bizim üçün çox vacibdi. Hələlik, “Neftçi” bizdən bir addım öndə görsənir. Amma bazar günü qələbə qazansaq, zənnimcə, çempionatın bir nömrəli favoriti olacağıq. Düzdü, həm “Neftçi”, həm də “Xəzər Lənkəran” yetərincə güclüdü, amma “Qarabağ” öz oyununu göstərəciyi təqdirdə rəqibimiz ancaq özümüz olacağıq”.
