31 mart 2011 22:37
Aleksandr Starkov: Bizə problem yaradacaq bir amil var
“Bakı”nın baş məşqçisi Aleksandar Starkov Premyer Liqanın 25-ci turunun “Xəzər Lənkəran”la oyunu öncəsi derbi anlamına gələn qarşılaşma və Antalyadakı təlim-məşq toplanışı haqqında fikirlərini söyləyib. Azerisport.az xəbər verir ki, latviyalı mütəxəssis açıqlamasında bunları bildirib:
“Antalyada təlim-məşq toplanışı təşkil etmək yaxşı təklif idi. Çünki çempionatda 2 həftəyə yaxın fasilə yaranırdı. Bu boşluqdan maksimum səmərəli istifadə etmək qərarına gəldik. Bildiyiniz kimi, Antalyada Türkiyə Superliqasının iki komandası ilə yoldaşlıq oyunu keçirdik. Bu oyunlarda çempionatda az oyun keçirən və eləcə də gənc futbolçular Nurlan Novruzov, Nicat Abdullayev, Rəhman Hacıyev, Aqil Məmmədova oynamaq imkanı verdik. Onlar səviyyəli komandalara qarşı keçirilən oyunlarda təcrübə qazandılar. Güclü rəqiblərlə oynamaq komandamızın oyununa müsbət təsir göstərir. Zənnimcə, təlim-məşq toplantımız faydalı oldu”.
Starkov “Xəzər Lənkəran”la oyun haqda isə bunları dilə gətirib: “Premyer Liqa oyununa gəldikdə isə “Xəzər Lənkəran” çempionatın liderlərindəndi və bizə qarşı oyuna yüksək motivasiya ilə çıxacaq. Çətin oyun olacaq. Biz öz tərəfimizdən ciddi hazırlaşırıq. Bizə problem yaradacaq bir amil var ki, 4 futbolçumuz milli komandalarının düşərgəsindən yenicə qayıdıb. Onların meydana çıxıb-çıxmayacaqları hazırlıq səviyyələrindən asılı olacaq. Biz hər oyuna eyni məsuliyyətlə yanaşırıq. “Xəzər Lənkəran”la qarşılaşmada da “Bakı” azarkeşləri, klub rəhbərliyini sevindirmək üçün yaxşı oyun göstərməliyik”.
