3 aprel 2011 18:34
Arif Əsədov: Layiqli qələbə qazandıq
“Neftçi”nin baş məşqçisi Arif Əsədov Premyer Liqanın 25-ci turunun “Qarabağ”la prinsipial oyununu şərh edib. Azerisport.az xəbər verir ki, paytaxt klubunun çalışdırıcısı 2 cavabsız qolla qalib gəldikləri vacib qarşılaşmadan sonra bunları dilə gətirib:
“Rəqibimizin bu qarşılaşmaya kimi 9 oyunluq qələbə seriyası var idi. Ancaq biz bu gün düzgün oyun quraraq, layiqli qələbə qazandıq. Rəqibin güclü və zəif tərəflərini analiz etmişdik, buna uyğun taktika qurmuşduq. Komandam da bu taktikanı düzgün yerinə yetirərək qalib gəldi. Futbolçularım demək olar ki, mənim dediklərimin hamısını yerinə yetirdi. Bu, bir derbi matçı idi. Sevinirəm ki, belə bir matçda qələbə qazanan tərəf məhz biz olduq”.
