5 aprel 2011 17:14
Vüqar Nadirov: Sona qədər döyüşəcəyik
Premyer Liqanın sonuncu turunda “Neftçi”ylə oyunda alınmış məğlubiyyət “Qarabağ”ın 9 oyunluq qələbə seriyasına son qoydu. Azerisport.az xəbər verir ki, Ağdam komandasının son zamanlarda formada olan forvardı Vüqar Nadirov da bu qarşılaşma ilə bağlı fikirlərini açıqlayıb.
23 yaşlı hücumçu sonuncu məlubiyyət və qarşıdan gələn oyunlar haqqında bunları dilə gətirib: “Oyuna istəkli çıxmışdıq. Belə elə erkən qol gözləmirdik. Ondan sonra çətin oldu. Deməzdim ki, “Neftçi” bizdən yaxşı oynadı. İlk qolu vurub, müdafiəyə oturdular, öz vaxtlarını gözlədilər. Daha bir qol vuraraq qələbə qazandılar. Millidə olmağımıza alışmışıq. Deməzdim ki, ona görə uduzduq. Təbii ki, 2 gün hazırlaşmaqla 1 həftə bir yerdə çalışmaq eyni deyil. “Neftçi” çempionatın ən güclü klublarından biridi. Ona görə də onlar da qələbə üçün meydana çıxmışdılar.
Artıq qarşıdakı oyunları fikirləşmək lazımdı. İndi bu oyunla yaşasaq heç nə qazanmayacağıq. “Neftçi”ylə daha bir dəfə də qarşılaşmalıyıq. Amma bakılılardan başqa daha 6 oyunumuz var. Biz hər zaman çətin məqamlardan çıxmağı bacarmışıq. 9 oyundu qələbə qazanırdıq. Bu baxımdan məğlubiyyət üzücü oldu. Artıq “Xəzər Lənkəran”la oyuna hazırlaşacağıq. Ötən mövsüm də hamı bizə ümidini itirmişdi. Amma sonda çempionluq şansı olan 3-4 komandadan biri idik. İndi yenə də son qədər döyüşəcəyik”.
