5 aprel 2011 17:42
Valeri Abramidze: Uğur bizdən üz dondərib
“İnter”in müdafiəçisi Valeri Abramidze AZAL ilə oyun barədə danışıb, son uğursuzluqların səbəbləri haqqında fikirlərini açıqlayıb. Azerisport.az xəbər verir ki, o, komandaya çempionatın lideri ilə qarşıdan gələn matç ərəfəsində toparlanmaq və rəqibə qarşı əsl mübarizə aparmaq lazım olduğunu vurğulayıb.
- AZAL ilə oyunda komanda pis təsir bağışlamadı, ancaq yenə də məğlub oldu. Bu qarşılaşma barədə fikirlərini öyrənmək maraqlı olardı.
- Biz pis oynamadıq, təhlükəli vəziyyətlər yaratdıq. Lakin yenə də realizasiyada böyük problemlər baş verdi. Artıq neçənci dəfədi ki, şanslarımızdan istifadə edə bilmirik. Ancaq AZAL özünün yeganə şansını realizə etdi. Deyə bilərəm ki, bu, bizi izləyən bəxtsizlikdi.
- Bu mövsüm “İnter”in realizasiyalarla bağlı böyük problemləri yarandı. Sənin fikrincə, komandanın qol vura bilməməsinin səbəbləri nədən qaynaqlanır?
- Zənnimcə, əsas səbəb bəxtsizlikdə gizlənir. Uğur bizdən üz dondərib. Lakin istənilən halda qarşıda hələ 7 tur var və bizə tez bir zamanda toparlanmaq lazımdı.
- Zədə ilə bağlı yaranmış uzun fasilədən sonra AZAL ilə oyunda ilk dəfə meydana çıxdın...
- Bəli. Türkiyədə keçirdiyimiz son təlim-məşq toplanışında dizimin yan bağlarını dartmışdım. Belə zədənin sağalması tam 6 həftə çəkdi. Şadam ki, hər şey arxada qaldı. Əlbəttə, mənə hələ yaxşı oyun kondisiyalarımı qaytarmaq lazımdı. Lakin əsas odu ki, indi səhhətimlə bağlı hər şey qaydasındadı.
- Qarşıda komandanı çempionatın lideri olan “Neftçi” ilə qarşılaşma gözləyir. Görüş haqqında nə düşünürsən?
- Bizə tam toparlanmaq və rəqibə qarşı əsl mübarizə aparmaq lazımdı. Başlıcası odu ki, bu yaxınlarda Birlik Kubokunda nümayiş etdirdiyimiz gücümüzə olan inamımızı və oyunumuzu qaytarmaq lazımdı.
