8 aprel 2011 16:56
Mahir Şükürov üçün 3 variant: Neftçi, Qəbələ, Samsunspor
Futbol üzrə Azərbaycan yığmasının yarımmüdafiəçisi Mahir Şükürov Rusiya Premyer Liqasında çıxış edən “Anji”dən ayrıldıqdan sonra yerli və xarici klubların maraq dairəsinə düşüb. Azerisport.az xəbər verir ki, Mahaçqala klubuyla yollarını ayırmağa qərar verən futbolçu hazırda Bakıda – “Neftçi”nin bazasında hazırlıq keçir.
Şübhəsiz ki, məhz bu üzdən onun elə yayda transfer pəncərəsi açılan kimi “ağ-qaralar”la müqavilə bağlayacağı haqda şayiələrin çoxalması təbii qarşılandı. Lakin bu gün saytımıza açıqlama verən baş məşqçi Arif Əsədov bu xəbərləri təkzib edərək, Mahirlə müqavilə bağlamağa hazırlaşmaqdıqlarını bildirdi.
Əvəzində Türkiyənin “Samsunspor” klubunun Mahirin xidmətində ciddi maraqlı olduğu üzə çıxdı. Lakin Samsun təmsilçisi Şükürovu transfer etməkdə nə qədər maraqlıdısa, millimizin üzvü də bir o qədər bu keçidə isti baxmır. Səbəb isə, “Samsunspor”un Türkiyənin birinci liqasında çıxış etməsidi. Baxmayaraq ki, müqayisə etdikdə, qardaş ölkənin Bank Asiya birinci liqası bizim Premyer Liqamızdan daha yüksəkdə durur.
Mahir üçün daha bir variant “Qəbələ”di. Bölgə təmsilçisinin ingilis çalışdırıcısı Toni Adams bu futbolçunun çıxışını uzun müddətdi millidən izləyir və onu öz komandasında görməyi arzulayır.
Digər təkliflər isə bizim paytaxt klublarındandı və Mahirin hələlik bu variantlardan hansına üstünlük verəcəyi dəqiq bilinmir. Azərbaycan yığmasının kapitanı hazırda sadəcə formasını itirməmək üçün “Neftçi”nin düşərgəsindəki məşqlərini davam etdirməklə məşğuldu.
