9 aprel 2011 11:55
Elnur Abdullayev: Qarabağ`a uduzsaq, çempionluğu unutmalıyıq
“Xəzər Lənkəran”ın yarımmüdafiəçisi Elnur Abdullayev azerisport.az saytına müsahibəsində komandasının “Qarabağ”la oyun öncəsi şanslarını dəyərləndirib və yığma komandamızdan danışıb.
- “Qarabağ”la oyundan nə gözləyirsiz?
- Bu, heç də adi oyun olmayacaq. Biz başa düşürük ki, XL son vaxtlar çox xal itirib. Bütün komanda ancaq qələbəyə köklənib. Ağdamlılarla oyun final matçı xarakteri daşıyacaq. Onsuz liderlə də xal fərqimiz 6-ya çıxıb. Bu üzdən bizə heç-heçə də sərf etmir. Başa düşürük ki, “Qarabağ” bizə asanlıqla xal verməyəcək. Ancaq biz bu oyuna hazırıq.
- Rəqib komandanı necə xarakterizə edərdiniz?
- “Qarabağ” ölkənin ən güclü 3 klubundan biridi. Bu komanda əla orta sahəyə malikdi. Rəşad Sadiqova böyük simpatiyam var. O, yaxşı top saxlamağı bacarır, əla və cəld ötürmələr verə bilir. Ağdamlılar çətin matçlarda qələbə qazanmağı bacarırlar. “Qarabağ” həm də azarkeşlərin ən sevimli klubudu. Odu ki, bizi gərgin mübarizə gözləyir. Özü də nəzərə almaq lazımdı ki, onlar son turda uduzublar.
- “Neftçi” – “Qarabağ” görüşünü izlədiz?
- Televizordan izlədim. Ağdamlılar 2 cavabsız qolla uduzsalar da, görünürdü ki, rəqibdən heç də pis oynamırlar. “Neftçi” əks-hücum futbolu oynadı. Ağdamlılar isə 90 dəqiqə boyunca hücum etdi. Sadəcə onların bəxti gətirmədi. İndi onlar qələbə qazanmaq istəyirlər. Bu üzdən bizə həm də psixoloji cəhətdən güclü olmaq lazımdı.
- Son 3 turda XL cəmi 2 xal toplaya bilib. Nə baş verir?
- Bilmirəm. Hər şey AZAL-a məğlubiyyətlə başladı. Komanda elə bil sındı. Əla oynasaq da, nəticə yoxdu. “Neftçi”yə qarşı əla oynadıq, iki xal itirdik. “Bakı” ilə oyunda hamı gördü ki, qol vardı. Təkrarda da görünür ki, oyunçumuz həmin epizodda qaydaları pozmurdu. Ancaq dedilər ki, qayda pozuntusu varmış. Bizə sadəcə oyunlara köklənmək lazımdı. Əlbəttə, əgər xal itiririksə, bunda günahkar özümüzük. XL bundan yaxşısına layiqdi. Bu vəziyyətdən çıxış yolu tapmaq lazımdı. Özümüz də bilmirik nə baş verir. “Qarabağ” üzərində qələbə bizə çox kömək edər.
- “Qarabağ” da son turda xal itirib...
- Nəticə haqda düşünmək lazımdı. Mən razıyam ki, oyunumuz yaxşı olmasa da, nəticə əldə edək. “Qarabağ”la bizi ölüm-dirim mübarizəsi gözləyir. Hesab edirəm ki, ağdamlılara uduzsaq, çempionluğu unutmalıyıq. Ondan sonra artıq ikinci yer üçün oynamalı olacağıq. Liderlə xal fərqimiz çox böyükdü.
- Yığmanın baş məşqçisi Berti Foqts sizi yenidən əsas komandaya dəvət edib. Bu dəvəti gözləyirdiz?
- Mən oynayıram və daimi məşq edirəm ki, formada qalım. Əgər Foqts hesab edirsə, yığmanın düşərgəsində olmalıyam, onda bu toplanışda iştirak etməyə borcluyam. Baş məşqçinin işi millini yaxşı futbolçulardan təşkil etməkdi. Mən də öz üzərimdə işləməkdə davam edirəm ki, əsas komandamıza da kömək edə bilim.
