10 aprel 2011 12:05
Əfran İsmayılov: XL-la görüş Neftçi ilə oyundan çətin olacaq
“Qarabağ”ın yarımmüdafiəçisi Əfran İsmayılov azerisport.az saytına müsahibəsində komandasının bu günkü “Xəzər Lənkəran”la oyunu ərəfəsində şanslarını dəyərləndirib.
- XL-la son oyundan qələbə ilə ayrılmışdız. Bu dəfəki qarşılaşmadan nə gözləyirsiz?
- Həmin oyundan artıq 3 ay keçib. “Xəzər Lənkəran” isə hazırda daha yaxşı oyun sərgiləyir. Ümumiyyətlə, mən onları Premyer Liqada ən güclü hesab edirəm.
- Onda niyə onlar birinci yerdə getmirlər?
- Düşünürəm ki, bu, onların oyunlarındakı müəyyən problemlərlə bağlıdı. Necə də olmasa çoxlu transferlər həyata keçirdilər ki, onların da tam uyğunlaşması üçün zamana ehtiyac var. Amma indi hiss olunur ki, artıq var gücləri ilə oynayırlar. Ona görə də, hesab edirəm ki, Lənkəran klubu ilə görüşümüz “Neftçi” ilə qarşılaşmadan da çətin olacaq.
- “Neftçi”yə məğlubiyyəti artıq unutmusuz?
- Əlbəttə, bütün fikirlərimiz artıq XL-la oyuna yönəlib. Amma əminliklə deyərdim ki, bundan əvvəlki qarşılaşmada biz məğlubiyyətə layiq deyildik. Sadəcə erkən qol bizi bir qədər geri saldı. Mənə elə gəlir ki, o, bizim üçün bir qədər gözlənilməz oldu.
- XL-la heç-heçə sizi qane edir?
- Biz ancaq qələbəyə oynayacağıq.
- Lənkəranlıların heyətində kimi daha güclü hesab edirsiz?
- Onlar əsl komanda oyunu sərgiləyirlər. Amma heyətlərində hər şeyi təkbaşına dəyişə biləcək futbolçular da var. Məsələn, Parksla Vobay. Adrian Pit də artıq tam uyğunlaşıb. Dərhal hiss olunur ki, A Seriyası təcrübəsinə malikdi.
- Belçika ilə oyunun heyətinə salınmadığı üçün məyus olmadınız?
- Hələ fevralda Berti Foqts məni Brüsselə apara bilməməyinin təəssüf doğurduğunu demişdi. Hər halda indi formamı bərpa etmişəm, hiss edirəm ki, daha yaxşı oynaya bilirəm. Baş məşqçi hətta bildirdi ki, mən almanlara mütləq qol vurmalıyam. Amma öncə Qazaxıstanla oyunda lazımı nəticə qazanmalıyıq. Hansı ki, bizi ancaq qələbə qane edir.
