11 aprel 2011 11:20
Rəşad Sadiqov: Neftçi çempionluğu asanlıqla əldən verməyəcək
“Qarabağ”ın kapitanı Rəşad Sadiqov Premyer Liqanın 26-cı turunun “Xəzər Lənkəran”la oyunundan (0:0) sonra azerisport.az saytının suallarını cavablandırıb.
- Komandanız niyə XL-a qalib gələ bilmədi?
- Bizim lənkəranlılarla oyunlarımız həmişə ağır və maraqlı alınır. Ona görə də bu oyuna ciddi hazırlaşmışdıq. Bilirdik ki, bu görüş heç istisna olmayacaq. XL açıq futbol sərgiləyir. Məhz bu üzdən onlarla oynamaq həm də ləzzət edir.
- Bu görüşdə də elə oldu?
- Bütün oyunlarımız belə keçir. Sadəcə, bu görüşdə qol vura bilmədik. Amma qol vəziyyətləri az olmadı. Onların da, bizim də belə şanslarımız oldu.
- Komandanız birinci hissədə daha fəal görünürdü...
- Birinci hissədə daha açıq futbol sərgiləməyə çalışdıq. Çox qaçdıq, çalışdıq ki, nəticədə bir qədər yorğunluq da yarandı. Artıq ikinci hissənin ortalarından etibarən görünürdü ki, hər iki komanda artıq yorulub.
- “Neftçi” “İnter”lə oyunda xal itirdiyindən sizin cütlükdən qələbə qazanan komandanın liderə əsas rəqib olacağı gözlənilirdi...
- Ola bilsin ki, “Neftçi” çempion olacaq. Amma qarşıda hələ altı tur qalır ki, həmin oyunlarda həm XL-ın, həm də bizim kifayət qədər şansımız qalır.
- Deməli, hələ mübarizədən çəkilməmisiz?
- Mənə elə gəlir ki, “Neftçi” çempionluğu asanlıqla əldən verməyəcək. Fikrimcə, mənimlə elə XL-ın da futbolçuları razılaşar.
- Belə çıxır ki, artıq lənkəranlılarla gümüş medallar uğrunda mübarizəni düşünürsüz?
- Bu da bizim üçün pis nəticə olmazdı. Amma ən yaxşısı çempionatın qalibi olmaqdı. Hər halda şanslarımız var və sona kimi mübarizəmizi davam etdirəcəyik.
