15 aprel 2011 01:56
Portuqaliya 3 - İspaniya 1 (YENİLƏNİB)
Çempionlar Liqasının ardınca UEFA Avropa Liqasında da 1/4 final mərhələsinin oyunlarına yekun vurulub. Azerisport.az xəbər verir ki, qitənin ikinci dərəcəli turnirinin yarımfinalına yüksəlmək iddiasında olan 8 ən güclü iştirakçı “dördlüy”ə düşmək üçün son şanslarını sınayıb.
Qeyd edək ki, bu mərhələdə Portuqaliya klublarının üstünlüyü diqqət çəkirdi. Birdən-birə 1/4-də 3 klubla təmsil olunan portuqalların bütün komandaları yarımfinala yüksəlməyə çox yaxın idi. Bu mənada “Benfica” və “Porto”nun işi daha asan idi.
Hər halda bir həftə öncə baş tutan ilk oyunlarda “Benfica” Hollandiya PSV-sini, “Porto” isə Moskva “Spartak”ını böyükhesablı məğlubiyyətlərlə yola salmışdı. Məhz bu üzdən sözügedən komandaların artıq yarımfinala vəsiqəni böyük ölçüdə təmin etdiyi vurğulamaq olardı. Gözlənildiyi kimi, hər iki komanda sensasiyaya imkan vermədi və səfərdə də istədiyi nəticəni qazana bildi. Xüsusilə, "Porto" səfərdə də 5 qol vurması ilə seçildi. Yeri gəlmişkən, bu günlərdə vaxtından öncə Portuqaliya çempionu adını rəsmiləşdirən “Porto” CSKA-nın ardından ikinci dəfə Rusiya klubunu mübarizədən kənarlaşdırmış oldu.
Portəgizlərin daha bir təmsilçisi “Braga” isə səfərdə Kiyev “Dinamo”su ilə qollu heç-heçəyə nail olduğundan, növbəti mərhələyə vəsiqəni cavab görüşündə rəsmiləşdirməli idi. Bu komanda matçın əvvəllərində azlıqda qalsa da, sona kimi qapısını toxunulmaz saxlamaqla səfər qolu sayəsində adını yarımfinala yazdırdı. Beləcə, 3 Portuqaliya klubunun hamısı mübarizəni davam etdirmək hüququ qazandı.
Digər qarşılaşma da formal xarakter daşıyırdı. İspaniyada keçirilən oyunda cütün taleyini həll etmiş “Villarreal” Hollandiyanın digər təmsilçisi “Twente” ilə səfər matçında üstünlüyünü əldən verməməli idi. Gözlənildiyi kimi ispanlar da sensasiyaya imkan vermədi və səfərdə də inamlı qələbəyə sevindilər.
Avropa Liqası
1/4 final (cavab oyunları)
14 aprel
Spartak (Moskva, Rusiya) – Porto (Portuqaliya) - 2:5 (ilk oyun – 1:5)
Qollar: Dzyuba, 52, Ari, 72 - Halk, 28, Rodriqes, 45, Quarin, 47, Falkao, 54, Mikael, 89.
Braga (Portuqaliya) - Dinamo (Kiyev, Ukrayna) - 0:0 (1:1)
Twente (Hollandiya) – Villarreal (İspaniya) - 1:3 (1:5)
Qollar: Bayrami, 23 - Rossi, 59-pen, Ruben, 84-pen, Kani, 89.
PSV (Hollandiya) - Benfica (Portuqaliya) - 2:2 (1:4)
Qollar: Dşudşak, 17, Lens, 25 - Luizao, 45, Kardozo, 63-pen.
Qeyd edək ki, yarımfinalda "Benfica" "Braga", "Porto" isə "Villareal" ilə qarşılaşacaq.
