15 aprel 2011 09:35
Elvin Beqiri: İnter`lə oyunda qələbə qazanacağıq
“Xəzər Lənkəran”ın müdafiəçisi Elvin Beqiri azerisport.az saytına müsahibəsində komandasının son oyunundan, eləcə də qarşıdan gələn “İnter”lə görüş öncəsi şanslarından danışıb.
- “Neftçi” “İnter”lə oyunda xal itkisi ilə üzləşəndən sonra sizin liderlə fərqi azaltmaq imkanınız olsa da, bundan yararlana bilmədiniz...
- Təkcə biz yox, elə “Qarabağ” da əla şans yaxalamışdı. Hər iki komanda qələbəyə köklənmişdi. Biz daha çox top saxlamağa, hücum qurmağa çalışırdıq. Gizlətmirəm ki, “Qarabağ”ın da kifayət qədər qol vəziyyətləri oldu. Oyunun sonlarında onlar hətta bizi cəzalandırmaq üçün əla imkanlara da malik idi. Fikrimcə, hər iki komandaya çətin oldu. Mümkündü ki, bizim lideri qabaqlamaq şansımız elə də çox olmayacaq. Ancaq bir xal qazanmağımızı da normal saymaq olar.
- XL “Neftçi”dən 6 xal geri qalır. Artıq onların məqsədə böyük ölçüdə çatdığını demək olar?
- Bizim hələ qarşıda “Neftçi” ilə oyunumuz var. Onlar həmçinin “Qarabağ”la da görüşəcəklər. Bütün komandalar “Neftçi”ni saxlamağa çalışır. Hamının onlara qarşı xüsusi motivasiya ilə oynaması təbii ki, rəqibimizə çətinliklər yaradacaq. Odu ki, məncə, çempionluğun taleyi hələ həll olunmayıb. Lider hələ xal itirəcək, buna əmin olmaq lazımdı.
- Final mərhələsində qələbə qazana bilməmisiz. Komandanızda nə baş verir?
- Birinci altılıqda ən güclü komandalar çıxış edir. Ona görə də belə komandalarla daim oynamaq çox çətindi. Bəzi oyunlarda bizim çox yaxşı şanslarımız olsa da, bəxtimiz gətirmir. Amma hələ özümüzə gəlmək üçün zamanımız var. Hələ 6 tur qalır və heç kim özünü sakit apara bilməz. İnanıram ki, “İnter”lə oyunda tam fərqli XL görə biləcəksiz. Nəhayət ki, bu oyunda qələbə qazanacağıq.
- Əgər yenə xal itirsəz, ikincilik uğrunda mübarizə aparmalı olacaqsız...
- Biz hələlik çempionluqdan imtina etməyə hazırlaşmırıq. “Qızıl” uğrunda “Neftçi” ilə yanaşı “Qarabağ” və XL da mübarizə aparır. Sona kimi oynamalı olacağıq. Nə vaxt ki, artıq şans qalmadığını görsək, onda ikincilik barədə fikirləşərik. Amma belə hələlik heç nə həllini tapmayıb. Hələ heç kim çempionun adını açıqlaya bilməz.
- “İnter”lə oyundakı şansları necə dəyərləndirirsiz?
- Onların “Neftçi” ilə oyununu görmüşəm. Çempion həmin matçda əla oynadı. Hakim penalti təyin etməsəydi, “bankirlər” qələbə qazanacaqdı. “İnter” hazırkı çempiondu və onlarla qarşılaşmada asan oyun gözləməyə dəyməz.
- Rəqibin heyətində hansı futbolçuları qeyd edərdiz?
- Kimisə xüsusi vurğulamaq istəməzdim. “İnter” komanda oyunu sərgiləyir. Son iki turda qol vuran Robertas Poşkus çox təcrübəli oyunçudu. O, artıq neçə ildi bu komandada çıxış edir. Ən təhlükəli futbolçularından biridi.
- Çoxları hesab edir ki, “İnter” XL üçün münasib rəqib deyil...
- Mən belə deməzdim. “İnter”ə qarşı oyunlar çətin keçir. Amma bir şeyi də nəzərə almaq lazımdı ki, artıq indi münasib rəqib yoxdu. Əgər siz statistikanı nəzərdə tutursuzsa, bundan danışmağa dəyməz. Qələbə üçün biz hər şeyə hazırıq.
