16 aprel 2011 16:52
Ramiz Məmmədovun ilk ev qələbəsi (YENİLƏNİB)
Bu gün Qazaxıstan çempionatında 7-ci turun oyunları keçirilib. Azerisport.az xəbər verir ki, hesabat turunun açılış matçında həmyerlimiz Ramiz Məmmədovun çalışdırdığı “Atırau” doğma divarlar arasında “İrtış”la münasibətlərinə aydınlıq gətirib.
Qeyd edək ki, həmyerlilərimizin komandası mövsümə elə də yaxşı başlamamışdı. Bu oyuna kimi cəmi 1 qarşılaşmada qələbə qazanan Məmmədovun yetirmələri 2 görüşdə heç-heçə etdiyi halda qalan bütün matçlarını da məğlub başa vurmuşdu. Onlar bu uğursuz gedişə növbəti ev oyununda son qoymağı hədəfləmişdilər. Digər ev matçlarında buna nail ola bilməyən “Atırau” “İrtış”a qalib gələcəyi halda, Məmmədov doğma azarkeşləri qarşısında ilk qələbəsinə sevinmiş olacaqdı. Lakin Pavlodar təmsilçisi geridə qalan 6 oyundan 4 qələbə qazanmaqla 4-cü pillədə qərarlaşdığından qarşılaşmanın heç də asan keçməyəcəyi dəqiq idi. Gözlənildiyi kimi, kifayət qədər gərgin keçən görüşün yalnız son dəqiqələrində vurulan yeganə qol həmyerlilərimizə ev oyunlarındakı ilk qələbə sevincini yaşadıb.
Qeyd edək ki, hazırda 8 xala malik olan "Atırau" 12 komanda arasında 7-ci pillədə qərarlaşıb.
Qazaxıstan Superliqası
7-ci tur
16 aprel
ATIRAU - İRTIŞ - 1:0 (0:0)
Qol: Aleynikov, 86.
