18 aprel 2011 16:44
“AZAL ilə qarşılaşma isə bizim üçün ilin oyunu olacaq”
“İnter”in yarımmüdafiəçisi David Odikadze Premyer Liqanın 27-ci turunun “Xəzər Lənkəran”la oyunu barədə danışıb, qarşıdakı “Qarabağ”la çempionat, AZAL-la kubok görüşü öncəsi şanslarını dəyərləndirib. Azerisport.az xəbər verir ki, o, öncə son qarşılaşmayla bağlı fikirlərini bölüşüb:
“Qarşılaşma kifayət qədər maraqlı və çətin alındı. Şəxsən mən “Xəzər Lənkəran”ı hazırda Azərbaycanın ən güclü komandası hesab edirəm. Onlara qarşı səfərdə oynamaq ikiqat çətindi. Buna görə də heç-heçəni çəkinmədən bizim üçün pis olmayan nəticə hesab etmək olar. Dolu stadion və komandalarını dəstəkləyən azarkeşlər, təbii ki, bizim işimizi çətinləşdirir. Lakin digər tərəfdən də etiraf etmək lazımdı ki, belə şəraitdə oynamaq kifayət qədər xoşdu”.
Qeyd edək ki, oyuna bir gün qalmış ad gününü qeyd edən Odikadze vurduğu qolla öz ad gününə hədiyyə etmiş oldu. Bəs görəsən, komanda yoldaşları onu necə təbrik edib: “Bütün uşaqlar ad günü münasibətilə məni təbrik etdilər. Lakin təəssüf ki, ad günümü qeyd etməyə azad vaxtım yoxdu. Ümid edirəm, tezliklə gec də olsa ad günümü qeyd edəcəyəm”.
Odikadze “Qarabağ” və AZAZ-la növbəti matçlar öncəsi isə bunları söyləyib: “Qarabağ” Azərbaycan futbolunun liderlərindən biridi və bizi kifayət qədər çətin qarşılaşma gözləyir. Biz hazırlaşacağıq və var gücümüzlə mübarizə aparacağıq. AZAL ilə qarşılaşma isə bizim üçün ilin oyunu olacaq. Bu mövsüm biz hələlik onları məğlub edə bilməmişik. Bundan başqa, bir dəfə hətta onlara böyük hesabla məğlub olmuşuq. Bu vəziyyət AZAL ilə qarşıdakı matçların prinsipiallığını artırır. Həmçinin deyə bilərəm ki, Azərbaycan Kuboku avrokuboka düşmək üçün yaxşı imkandı”. (klubun rəsmi saytı)
