19 aprel 2011 16:12
Qarabağ niyə son oyunlarda qol vura bilmir?
“Qarabağ” ötən ilin dekabrından 9 oyunluq qələbə seriyası əldə etsə də, aprel ayında keçirdiyi oyunlarda qələbə qazana bilməyib. Azerisport.az xəbər verir ki, son 2 oyunda qolsuz bərabərliyə razılaşan komanda 3-cü pillədəki mövqeyini əldən verməyib.
Daim baxımlı, zövqlü oyuna üstünlük verən Qurban Qurbanovun komandası son oyunlarda qol vurmaqda çətinlik çəkir. Bunun səbəblərini araşdırmaq üçün klubun rəsmi saytında məşqçilər korpusunun üzvlərinə müraciət olunub. Ağdam klubunun məşqçilərindən Müşfiq Hüseynov sözügedən problemlə bağlı bunları dilə gətirib:
“Deməzdim ki, qol vurmağa çətinlik çəkirik. Demək olar ki, hər oyunda qol vurmaq şansımız olur. Ardıcıl 9 oyunda qələbə qazananda komandamızda qol vurmaq baxımından elə də problem hiss olunmurdu. Amma bu seriyanın qırılması bir qədər komadada psixoloji təzyiq yaradıb. Amma bunu böhran dərəcəsində qabartmaq düzgün deyil. Futbolda belə şeylər olur. Məncə vuracağımız ilk qolla qolların ardı gələcək. Bizim futbol daha çox kollektiv oyuna əsaslanır. Hər hansısa futbolçunun üzərinə yüklənmək düzgün deyil”.
Elçin Rəhmanovun məsələyə münasibəti isə belə olub: “Biz yenə öz oyunumuzu göstərməyə çalışırıq. Amma bir şey var ki, biz qələbə qazandıqca rəqiblər də bizə qarşı xüsusi motivasiya ilə oynayır. Bizə qarşı müdafiədən oynadıqlarına görə daha çox əziyyət çəkməli oluruq. Amma artıq bu problemi çözmüşük. İnşallah, qarşıdakı oyunlarda bunun şahidi olacağıq. Müşfiq müəllimin dedikləriylə razıyam ki, bəzən futbolda belə vəziyyətlər qaçınılmazdı. Amma belə durumda toparlanmağı bacarmaq lazımdı. Ön xətt oyunçularımızın çempionatın sonuna yaxın “partlama” edəcəyinə inanıram”.
