19 aprel 2011 16:25
Neftçi Mpenzanın qardaşını da Bakıya gətirir
Belçikanın ən məşhur futbolçularından sayılan Mbo Mpenza "Neftçi" PFK-nın dəvəti ilə sabah Bakıya təşrif buyuracaq. Azerisport.az xəbər verir ki, son illərin ulduz oyunçusu ölkəmizdə olduğu müddətdə Azərbaycan futbolu ilə yaxından tanış olacaq, futbol mütəxəssisləri ilə görüşəcək, "Neftçi"nin bazasına baş çəkəcək.
Mbo Mpenzanın Bakıya səfəri heç də təsadüfi deyil. Qeyd edək ki, Mbo Mpenza "Neftçi"nin şərəfini qoruyan Emil Mpenzanın doğma qardaşıdır. O, peşəkar futbolçu karyerası ərzində "Sportinq", "Qalatasaray", "Anderlext" kimi nüfuzlu klubların formasını geyinib. Belçika yığmasının heyətində 10 il çıxış etmiş Mbo Mpenza zədə ucbatından karyerasını 2007-ci ildə, 31 yaşında bitirib.
Hazırda Mbo Mpenza Belçika telekanallarında futbolla bağlı verilişlərə mütəxəssis qismində qatılır. Bundan başqa, məşhur futbolçu qəzetlərlə də əməkdaşlıq edir.
