19 aprel 2011 11:48
Benuahi: Hamı bilir ki, azərbaycanlı hakimlər necə işləyir
AZAL-ın yarımmüdafiəçisi Zohair Benuahi azerisport.az saytına müsahibəsində Premyer Liqanın 27-ci turunun “Neftçi” ilə oyununu şərh edib, həmçinin növbəti çempionat və kubok oyunlarındakı şanslarından danışıb.
- “Neftçi” ilə oyundakı yenilginizlə bağlı nə deyə bilərsiz?
- Biz rəqibdən daha yaxşı oynadıq. Komandamız birinci hissədə çox yaxşı futbol sərgilədi və göstərdi ki, medallar uğrunda mübarizə apara bilər. İlk qolu biz vurduq, üstünlüyə yiyələndik. Amma sonda qeydə alınan hesab məni çox məyus etdi. Biz qələbəyə layiq idik. Hamı gördü ki, AZAL-ın futbolçuları “Neftçi”dən daha yaxşı oynayırdı. Sadəcə onların bəxti gətirdi. Ən azı biz bir xal götürməli idik. Məğlubiyyəti heç birimiz gözləmirdik.
- Necə oldu ki, bir dəqiqəyə iki qol buraxdınız?
- Bu, heç də “Neftçi”nin sayəsində yox, öz səhvlərimiz nəticəsində oldu. Çox kobud səhvlər buraxdıq ki, rəqib də bundan dərhal yararlandı. İki dəqiqəyə iki qol sadəcə kabusdu. Biz sanki arxayınlaşmışdıq. “Neftçi” hesabı bərabərləşdirəndən sonra özümüzə gələ bilmədik. Amma oyunumuz mənim çox xoşuma gəldi.
- Demək olar ki, 3 xalı əldən verməklə siz həm də çempionluq şanslarınızı itirdiniz...
- Sona kimi mübarizəmizi davam etdirəcəyik. Qarşıda hələ 5 tur var və biz 4-cü pillədəyik. Hər şey mümkündü. AZAL hətta ikinci və üçüncü pillələrə də yüksələ bilər. Mənə elə gəlir ki, qızıl medalların taleyi hələ həll olunmayıb. “Neftçi” hələ çempion deyil.
- “Neftçi” ilə oyundakı hakimliyi necə qiymətləndirirsiz?
- Onlar qələbə qazandı və bu, hər şeyi deyir. Hakimlik haqda danışmaq artıq olardı. Hamı bilir ki, azərbaycanlı hakimlər necə işləyir. Maraqlıdı ki, “altılığ”ın bütün klubları hakimləri tənqid edir. Deməli, problem var. Çoxlu səhvlər olur.
- AZAL-ın avrokuboklara düşmək şanslarını necə qiymətləndirirsiz?
- Bizdə bunun üçün əla şanslar var. Biz medallar uğurnda mübarizəmizi davam etdiririk. Əsas ümidlərimiz isə ölkə kuboku ilə bağlıdı. Əgər yarımfinalda qələbə qazana bilsək, onda avrokuboklara daha da yaxınlaşmış olacağıq. Bu mövsüm bizim komandaya heç kim inanmaq istəmirdi. Amma indi AZAL-ın nə qədər yaxşı oynadığı göz önündədi. Biz daha da yaxşı oynaya bilərik. Hər halda qarşıdakı günlərdə hər şeyə aydınlıq gələcək.
- Çempionatda siz “İnter”ə qalib gəlmisiz. Kubokda da bunu təkraralaya biləcəksiz?
- Bəli. Ammakubokdatamfərqlioyunolacaq. Əlbəttə, “İnter” təhlükəli komandadı. Onların heyətində çoxlu yaxşı futbolçular çıxış edir. Biz onlar üzərində qələbə qazansaq da, heç də 90 dəqiqə müdafiə olunmaqla məşğul olmurdular.
- Mövsüm başa çatanda komandada qalacaqsız yoxsa başqa planlarınız var?
- AZAL-da məni hər şey qane edir. Klubla müqaviləm var. Hələ gələcək haqda düşünmürəm. Bu mövsümü bitirib, nəticələrə baxmaq lazımdı. Hələlik avrokuboklara düşməyi çox istəyirik. Ondan sonra mənim gələcəyimlə də bağlı danışarıq.
