20 aprel 2011 02:55
"Azərbaycanla qarşıdakı oyunlara çox ciddi hazırlaşırıq"
AÇ-2012-nin seçmə mərhələsi çərçivəsində millimizin rəqiblərindən olan Qazaxıstan yığmasının baş məşqçisi Miroslav Beranek rəhbərlik etdiyi kollektivin komandamıza qarşı kimin kapitanlığı altında çıxacağını açıqlayıb. Azerisport.az xəbər verir ki, qazaxların çalışdırıcısı bu məsul vəzifəni Astana “Lokomotiv”inin yarımmüdafiəçisi Andrey Karpoviçə həvalə etməyə hazırlaşdığını dilə gətirib.
Çexiyalı mütəxəssisin sözlərinə görə, Qazaxıstan millisində vitse-kapitan vəzifəsini isə “Aktobe”dən Samat Smakov yerinə yetirəcək. Lakin Beranek bunun üçün ilk növbədə adıçəkilən futbolçuların qarşıdakı oyunlarda, eləcə də millimizlə qarşılaşmada əsas komandanın düşərgəsinə çağırılmasının vacibliyini qeyd edib.
Onun yığmamızla oyunda çıxışına ümid bəslədiyi əsas futbolçulardan biri “Şaxtyor”dan Jambıl Kukeyevdi: “Kukeyevin Azərbaycanla oyunda əsas heyətdə meydana çıxması haqda düşünürəm. Hər halda qarşıdakı oyunlarda onun “Şaxtyor”dakı çıxışını daha diqqətlə izləməyim lazım gələcək”.
Lakin Beranek hələlik iyunun 3-də Astanada baş tutacaq millimizlə ev oyunu üçün heyətlə bağlı strategiyası tam bəlli deyil: “Kayzerslauterndəki Almaniya ilə oyunda gənc futbolçular çox yaxşı təsir bağışladılar. Buna görə də onlara klublarında keçirdikləri oyunlar zamanı daha çox diqqət ayırmaq istəyirəm. Amma belə vacib oyunlarda biz təcrübəli futbolçuları da unutmamalıyıq”.
Sonda millimizin rəqibinin çalışdırıcısı qarşısına qoyulan vəzifə və məqsədləri barədə də danışıb: “Qarşımıza qrupda 5-ci pilləni tutmaq vəzifəsi qoyulub. Bu, mənim 2011-ci ildəki uğurumun əsas meyarlarından biri olacaq. Axı məhz bundan sonra biz müqavilənin artırılmasını müzakirə edə bilərik. Azərbaycanla qarşıdakı oyunlar üçün çox ciddi hazırlaşırıq. Azərbaycan ciddi rəqibdi. Türkiyə kimi rəqibə qalib gəliblər. Amma biz də güclü olduğumuzu göstərmək üçün maksimum çalışırıq”.
