20 aprel 2011 17:21
Arif Əsədov: Flavinyo millimizə lazımdı
“Neftçi”nin baş məşqçisi Arif Əsədov komandasının yarımmüdafiəçisi Flavinyonun mart ayının ən yaxşı futbolçusu seçilməsinə münasibətini açıqlayıb. Azerisport.az xəbər verir ki, paytaxt klubunun çalışdırıcısı oyunçusunun cari mövsümdə ikinci dəfə ən yaxşı seçilməsini belə qiymətləndirib:
“Biz çox şadıq ki, Flavinyo növbəti dəfə ən yaxşı seçildi. Bizim futbolçular bu mövsüm fərdi şəkildə özlərini ən yaxşı tərəfdən göstərməyi bacarırlar. Bu da məni sevindirməyə bilməz”.
Əsədov həmçinin Flavinyonun yığmamızın heyətinə cəlb olunmasına da münasibətini açıqlayıb: “Bu haqda qərarı biz klub rəhbərliyi ilə birgə qəbul edə bilərik. Aydın məsələdi ki, Flavinyonun oynadığı mövqe baxımından yığmamızda problemlər var. Belə futbolçular əsas komandamızın işini yüngülləşdirə bilər. Hesab edirəm ki, Flavinyo Azərbaycan millisinə lazımdı”.
