21 aprel 2011 14:39
Qurban Qurbanov: Onları hesabdan silmək düzgün deyil
“Qarabağ” Premyer Liqanın növbəti turunda qarşılaşacağı “İnter”lə oyunun hazırlıqlarını davam etdirir. Azerisport.az xəbər verir ki, millinin düşərgəsində olan 6 futbolçusunun imkanından məhrum olan komanda məşqlərini Suraxanı qəsəbə stadionunda davam etdirir.
Bazar günü baş tutacaq oyunöncəsi ağdamlıların baş məşqçisi Qurban Qurbanov “bankirlər”lə oyunun hazırlığı və komandanın durumu haqqında fikirlərini dilə gətirib: “Hazırlığımızı normal qaydada davam etdiririk. Məlum səbəblərdən tam heyətlə məşq edə bilmirik. Bizdən 6, “İnter”dən isə 2 futbolçu millinin düşərgəsindədi. Sadəcə 2 gün tam heyətlə məşq edə biləcəyik. Çalışacağıq ki, maksimum ideal səviyyədə meydana komanda çıxaraq. Dəyişikliklərin olması mümkündü. “İnter”lə oyun olduqca çətin keçəcək. Onlar son vaxtlar uğurlu çıxış edirlər. Oyunlarında həqiqətən artım var. Üstəlik, Kaxaber Sxadadze kimi bacarıqlı məşqçiləri var. Son zamanlar artırdıqlarını görsək bizimlə oyuna qələbə üçün çıxacaqlarını gözləmək olar. Təbii ki, biz də eyni məqsəd üçün mübarizə aparacağıq. Final mərhələsinin ilk turunda da “İnter”lə oyunumuz çətin, taktiki mübarizə şəraitində keçmişdi. Sona 5 tur qalıb. Ona görə də oyunlar daha da gərgin keçəcək. “İnter” ölkənin son çempionudu. Ona görə də onları hesabdan silmək düzgün deyil”. (klubun rəsmi saytı)
