21 aprel 2011 19:12
Ukrayna millisinin baş məşqçisi nəhayət ki, açıqlandı
Futbol üzrə Ukrayna yığmasının yeni baş məşqçisinin kimliyi nəhayət ki, müəyyənləşib. Azerisport.az xəbər verir ki, vaxtilə bu komandanın sükanı arxasında çalışmış Oleq Bloxin yenidən Ukrayna millisinin baş məşqçisi seçilib.
Sözügedən qərar Ukrayna Futbol Federasiyasının İcraiyyə Komitəsinin iclasında qəbul edilib. Belə ki, yeni baş məşqçinin təyinatı ilə bağlı İK-da səsvermə keçirilib. Düzdü, bu səslərin çoxunu gənclərdən ibarət yığmanın baş məşqçisi Pavel Yakovenko qazanıb. Lakin bu mütəxəssis 2011-ci il Avropa çempionatının final mərhələsinə vəsiqə qazanan və 2012-ci il London Yay Olimpiadasında iştirak şansları olan hazırkı komandasında işini davam etdirməyə üstünlük verib. Bloxin isə səs sayında ikinci yeri tutub. Məhz bu üzdən İK məhz bu mütəxəssisin baş məşqçi təyin olunmasından başqa çıxış yolu tapmayıb.
Qeyd edək ki, Oleq Bloxin 2003 – 2007-ci illərdə də Ukrayna millisinin baş məşqçisi olub. Bu komanda Bloxinin rəhbərliyi altında tarixində ilk dəfə 2006-cı il dünya çempionatında iştirak edib və 1/4 finaladək irəliləyib.
