21 aprel 2011 11:27
Flavinyo: Millidə çıxış etmək haqda təkbaşına qərar qəbul edə bilmərəm
“Neftçi”nin yarımmüdafiəçisi Flavinyo Premyer Liqanın mart ayı üçün ən yaxşı futbolçusu seçilməsi münasibətilə azerisport.az saytının suallarını cavablandırıb.
- Qələbə münasibəti ilə sizi təbrik edirik. Təəssüratlarınız necədi?
- Mənə səs verən hər bir kəsə təşəkkürümü bildirirəm. Mən şadam ki, artıq ikinci dəfə aydın ən yaxşı futbolçusu seçilirəm. Diqqət çox vacibdi.
- Bəs siz bu ay üçün kimi ən yaxşı seçərdiniz?
- Bir sıra futbolçular var ki, öz çıxışları ilə mənim diqqətimi çəkməyi bacarıblar. Bizim Ruslan Abışov ən yaxşı olmağa layiqdi. Mən ona səs verərdim. Bundan əlavə AZAL-dan Zohair Benuahiyə də səs vermək olardı. “Xəzər Lənkəran”dan Julius Vobay pis deyil. Hər halda mən mart ayında bu üçlük arasında seçim edərdim.
- 1111 manatlıq mükafatınızı hara xərcləməyi planlaşdırırsız?
- Hələlik, bilmirdəm. Mən heç ilk dəfə aldığımı da heç yerə xərcləməmişəm. Pullar hələ də kartımda qalır. Onları gələcək üçün saxlayıram. Mənə gələcəkdə lazım olacaq.
- Azərbaycan yığmasında çıxış etmək perspektivinə necə baxırsız?
- Mən bura gələndə demişdilər ki, qarşındakı yeganə vəzifə “Neftçi”nin çempionluğu üçün əlindən gələni etməkdi. Buna görə hazırda məni klubum maraqlandırır. Azərbaycan yığmasında çıxış etmək böyük şərəfdi. Lakin mən bu haqda təkbaşına qərar qəbul edə bilmərəm. Bilmək lazımdı ki, AFFA bu haqda nə düşünür. Həmçinin “Neftçi”nin baş məşqçisi Arif Əsədov da sözünü deməlidi. Klub prezidenti Sadıq Sadıqovun razılığı olmadan da mən heç bir qərar qəbul edə bilmərəm. Bax bu son iki şəxs razı olsalar, çox sevinərəm.
- Bir sıra milliləşmiş futbolçular Azərbaycan yığmasına dəvət aldıqdan sonra formasını itirirlər...
- Bu haqda mənə danışıblar. Buna görə də mənim Arif Əsədovla ətraflı söhbət etməyim lazımdı. Bu, son dərəcə prinsipial məsələdi. İndi isə “Neftçi” mənim üçün hər şeydən önəmlidi.
- Növbəti turda sizi “Bakı” ilə oyun gözləyir...
- Bizə qarşı bütün komandalar ikiqat güclə mübarizə aparır. Fikir verdinizsə, AZAL son oyunda bütün gücünü sərf etdi. “Bakı” altıncı pillədə qərarlaşsa da, güclü komandadı. Bu komanda istənilən favoriti xalsız qoya bilər.
- Bahodir Nasimovun artıq uzun müddətdi qol vura bilməməsi sizi narahat etmir ki?
- Bahodir meydanda çox iş görür. Düzdü, qol vurmasa da, “Neftçi”nin irəliləməsində bu, heç bir təsirini göstərmir. Nasimov klubumuz üçün lazımlı oyunçudu. Onun hazırkı uğurlarımızda xidməti də kifayət qədər yüksəkdi.
