22 aprel 2011 11:33
“O, özü də bilir ki, Azərbaycan heç də asan rəqib deyil”
AÇ-2012-nin seçmə mərhələsində yığmamızın rəqiblərindən olan Qazaxıstan yığmasının hücumçusu Samat Smakov azerisport.az saytının suallarını cavablandırıb.
- Yenidən Qazaxıstan yığmasında qayıtdığınızı demək olar?
- Məni Belarusla yoldaşlıq oyununa dəvət etmişdilər. Ümumiyyətlə yığmada çox şey dəyişib. Yeni baş məşqçi ancaq ən yaxşıları yığır və güclü komanda yaratmaq istəyir. Görünür ki, o, uğur qazanmaq istəyir. Təəssüf ki, mən Almaniyaya qarşı oynaya bilmədim. Zədəm var idi. Bu günlərdə sağalmışam. Yəqin ki, iyunda baş tutacaq seçmə oyunlarda forma geyə biləcəm. Bunu çox istəyirəm.
- Niyə sabiq baş məşqçinin rəhbərliyi altında çıxış etmirdiz?
- Onunla aramızda fikir ayrılığı var idi. Başqa da bir neçə futbolçu var idi ki, o, şans vermək istəmirdi. Mənə elə gəlir ki, o, başqalarının fikirlərini eşitməyi sevmirdi. Miroslav Beranekin qarşısına isə konkret vəzifə qoyulub.
- Bu da ondan ibarətdi ki, Azərbaycan yığmasını qabaqlamaq lazımdı, eləmi?
- Bizim yığmamızın qarşısına qoyulan vəzifələrdən biri qarşıdakı oyunda ilk qolumuzu vurmaq və xallar qazanmaqdı. Biz indiyə qədərki oyunlarda heç nəyə nail ola bilməmişik. Amma sizin yığma ilə qarşılaşmada mümkün qədər yaxşı oynamalıyıq.
- Hazırda Azərbaycan millisi sizdə necə təəssürat yaradır?
- Sizin komandanı çox yaxşı tanıyırıq. Azərbaycan millisi son vaxtlar inkişaf edib. Bunu elə Türkiyə üzərindəki qələbəniz də sübut etdi. Buna görə də bizə Astanada nə qədər çətin olacaqsa, Bakıda ikiqat çətinliklə üzləşəcəyik.
- Azərbaycan yığmasından kimisə xatırlayırsız?
- Bəli. Vaqif Cavadov hələ də yığmada oynayır?
- Bəli, o, “Twente”dən vətənə qayıdıb...
- O, Hollandiyaya gedəndə çox yazıldı. Həmçinin Yunisoğlu var. Biz onunla Moskvada keçirilən o vaxtkı “Birlik Kuboku”nda da qarşılaşmışdıq. Yaxşı müdafiəçidi.
- Yığmanızın digər hücumçusu Ulan Konısbayevin öncədən yığmamızı “dağıdacağınıza” dair iddialı açıqlamaları yayılsa da, sonradan iddia etdi ki, o, belə sözlər deməyib...
- Düzdü. Hətta mən onunla bu barədə ciddi söhbət etməyə hazırlaşırdım. O, perspektivli futbolçularımızdandı. Mən heç onun elə sözlər işlətməsinə inanmırdım. Axı o, özü də bilir ki, Azərbaycan heç də asan rəqib deyil. Onun özünün isə bu görüşdə iştirakı sual altındadı.
- Qazaxıstan yığmasında nə kimi dəyişikliklər gözlənilir?
- Yeni baş məşqçi çempionatın bütün oyunlarını izləyir və gənc futbolçuları qeyd edir. Beranek tamamilə yeni komanda qurmağa çalışır. Amma eyni zamanda təcrübəli futbolçuların da hamısını unurmur.
- Qorxmursuz ki, siz də bu prosesdən kənarda qala bilərsiz?
- Hər şey baş məşqçidən asılıdı. Mənim işim oynamaqdı.
