23 aprel 2011 00:42
Sami Xedira Bakıya gəlməkdən məhrum oldu
İspaniyanın “Real” (Madrid) klubunun və Almaniya yığmasının yarımmüdafiəçisi Sami Xedira sıradan çıxıb. Azerisport.az xəbər verir ki, futbolçunun İspaniya kubokunun finalında “Barcelona” ilə qarşılaşmada ağır zədə ilə üzləşdiyi bildirilir.
Hətta almaniyalı orta sahə oyunçusunun mövsümü qapatdığını iddia edənlər də olub. Lakin Madrid klubu hələlik bu informasiyaları təsdiqləmir. Elə “Real”ın baş məşqçisi Joze Mourinyo da İspaniya və Almaniya mətbuatında yayılan xəbərləri böyük təəccüblə izlədiyini gizlətməyib: “Düzdü, Xediranın zədəsi də digərləri qədər önəmlidi. Bu, istər-istəməz qarşıdakı oyunlarda işimizi çətinləşdirəcək. Amma mövsümü erkən qapatdığına dair yayılan xəbərlər başdan-ayağa yalandı. Yaxın günlərdə oynaması çətindi. Çünki tibbdə möcüzələr olmur. Amma qısa zamanda meydana qayıdacağına inanırıq”.
Bu zədə səbəbindən Xediranın nə həftəsonu baş tutacaq “Valencia” ilə La Liqa, nə də “Barcelona” ilə Çempionlar Liqasının yarımfinal görüşlərində forma geyməsi mümkün olacaq. Onun həmçinin AÇ-2012-nin seçmə mərhələsi çərçivəsində Avstriya və Azərbaycanla oyunlarda da iştirak etməyəcəyi iddia olunur.
