25 aprel 2011 13:10
XL tarixinin ən uğursuz seriyasına son qoydu
“Xəzər Lənkəran” tarixinin ən uğursuz seriyalarından birinə son qoyub. Azerisport.az xəbər verir ki, tarixi ərzində ilk dəfə olaraq ardıcıl 6 oyun qələbəyə həsrət qalan bu komanda sözügedən seriyanı Azərbaycan Premyer Liqasının 28-ci turunun AZAL-la qarşılaşmasında qırıb.
Rəqibi 3:0 hesabı ilə darmadağın edən cənublular sonuncu dəfə 51 gün əvvəl qalib gəlmişdi. Ötən ayın 3-də keçirilən matçda “Xəzər Lənkəran” ölkə kubokunun 1/4 final mərhələsinin səfər oyununda “Neftçi”ni məğlub etmişdi – 4:3.
Martın 3-dəki görüşdən sonra “Neftçi” ilə kubokun cavab qarşılaşmasında və çempionat görüşündə, həmçinin “İnter”lə Premyer Liqa görüşlərini doğma meydanda keçirən “ağ-yaşıllar” hər 3 halda 1:1 hesabı ilə kifayətlənmişdi. Çempionata təsadüf edən son 3 səfər qarşılaşmasında isə komanda qola həsrət qalmışdı. AZAL-a 0:1 hesablı məğlubiyyət, “Qarabağ” və “Bakı” ilə qolsuz heç-heçələr 7 xal itkisinə gətirib çıxardı.
Qeyd edək ki, çempionatdakı son qələbə səfərdə “İnter” üzərində qazanılmışdı. Həmin 3:1 hesablı zəfər 55 gün əvvəl fevralın 27-də qeydə alınmışdı.
