25 aprel 2011 14:23
Aqil Nəbiyev: Finala vəsiqəni ilk oyunda qazanmaq istəyirik
AZAL-ın kapitanı, millimizin üzvü Aqil Nəbiyev Azərbaycan kubokunun “İnter”lə oyunu ərəfəsində azerisport.az saytının suallarını cavablandırıb.
- “İnter”lə oyuna hazırlıqlarınız necə gedir?
- Bu turnir avrokuboklara getmək üçün ən yaxın yoldu. Bizim ambisiyalarımız ciddidi. Finala adlamaq və qələbə qazanmaq istəyirik. Bunun üçün isə təbii ki, öncə “İnter”i mübarizədən kənarlaşdırmalıyıq.
- Siz ki bu komandaya qalib gəlməyin yolunu bilirsiz...
- Düzdü, biz onlarla bu mövsüm bir neçə dəfə qarşılaşmışıq və heç bir oyunda uduzmamışıq. Ciddi uğurdu.
- Amma indi də “bankirlər” revanş haqda düşünür. Sizcə, bu, AZAL-a əlavə çətinlik yaratmayacaq?
- Hesab edirəm ki, bu, peşəkat yanaşma olmazdı.
- İlk oyundan nə gözləyirsiz?
- Təbii ki, cütün taleyini elə ilk oyunda həll etməyə çalışacağıq. Səfərdə oynayacağımıza rəğmən, qələbə üçün döyüşəcəyik. Əgər birinci oyunda qələbə qazana bilsək, çətin ki, finala çıxmağımıza nəsə mane olsun.
- Amma Lənkərandakı kimi oynasaz, buna nail olmağınız inandırıcı deyil...
- “Xəzər Lənkəran”a böyükhesablı yenilgiyə (0:3) layiq olmadığımızı düşünürəm. Biz birinci hissədə heç də pis oyun sərgiləmədik. Rəqibimiz ilk yarıda demək olar ki, heç nə edə bilmirdi. Bu, çox şeydən xəbər verirdi.
- Amma fasilədən sonra hər şey dəyişdi...
- İkinci hissəyə artıq tam başqa komanda çıxmışdı. Mən AZAL-ı tanıya bilmirdim. Biz Ndukayla birgə yığmanın düşərgəsindən yorğun qayıtmışdıq. Uşaqlar da tam hazır görünmürdü. Hərdən belə də olur.
- Siz belə darmadağını xatırlayırsız?
- Yadıma gəlmir. Amma ümid edirəm ki, bu nəticə bizə kubok oyunu ərəfəsində mənfi təsir göstərməyəcək. İstənilən halda üçüncü yer uğrunda mübarizəmizi də davam etdiririk. Qarşıda 4 tur var. Bizi isə “Qarabağ” və “Neftçi” ilə ev oyunları gözləyir. Komandamızın potensialı məni ümidli danışmağa sövq edir.
