25 aprel 2011 18:51
Neftçi jurnalının aprel sayı satışda (FOTO)
"Neftçi" klubunun rəsmi jurnalının aprel ayı üçün nəzərdə tutulan sayı işıq üzü görüb. Azerisport.az xəbər verir ki, jurnalın ideya rəhbəri "Neftçi" PFK-nın prezidenti Sadıq Sadıqov, baş redaktoru Mətbuat və İctimaiyyətlə Əlaqələr Departamentinin rəisi Elnur Əşrəfoğludu. Jurnal şərti olaraq, rəsmi, birinci, ikinci hissə və əlavə vaxtdan ibarətdi.
Rəsmi hissədə Azərbaycan futbolunda qazanılan uğur, dövlət başçısı, Milli Olimpiya Komitəsinin prezidenti İlham Əliyevin ölkə idmanına, o cümlədən futbola göstərdiyi diqqət və qayğı barədə yazılıb. Birinci hissədə Premyer Liqanın 21-26-cı turlarının xülasəsi, gənc və perspektivli futbolçu Cavid İmamverdiyevin müsahibəsi, "Neftçi"nin yeni yaradılmış B komandası haqqında yazı, eləcə də "Neftçi" öz gücünə oynayır!" məqaləsini oxumaq mümkündü.
İkinci hissədə isə "Neftçi"nin 17 yaşlılardan ibarət komandası barədə geniş yazı var. Bundan başqa, bu yaxınlarda ikinci dəfə "Ayın ən yaxşı oyunçusu" seçilən Flavinyonun müsahibəsi, əməkdar jurnalist Ələkbər Abbasovun "Neftyanik" adı necə dəyişdirilib "Neftçi" oldu?" yazısı və "Neftçi"nin doğma həkimi, bir müddət sonra komandaya qayıdan Boris Xetaqurovun müsahibəsi də ikinci hissədədir. Əlavə vaxt da rəngarəng məqalələrlə oxucuların görüşünə gəlib. Burada "Flaqman" Azad Azarkeşlər Qrupunun rəhbəri Ceyhun Bədəlzadənin müsahibəsi, Ruslan Abışovun bu yaxınlarda klipə çəkilməsi barədə yazı yer alıb. Çempionluğa addım-addım yaxınlaşan "Neftçi" klubunun rəsmi jurnalında komandamızın son görüşlərindən rəngarəng fotolar da əksini tapıb.
